最近港大學生會改選搞到滿城風雨，原來喺中環都好多人關注事件發展。先講喺立法會方面，𠵱家班立法會議員，特別喺民主黨入面，有好多港大學生會「老鬼」，佢哋睇見咁環境都好關心，重有人心急到想出手幫忙。事關港大咁多年都係學運先鋒，培養唔少民主派人士，如今次「淪陷」，點對得住「列祖列宗」哩！
除民主派外，喺政府同商界中，都有唔少當年港大「國粹派」核心成員，有港大前「國粹派」成員同八方講，佢哋都覺得應該有啲較溫和嘅學生出嚟參選，起碼唔係吓吓得一把聲音。但佢哋睇到報紙報道，話「和風閣」兩個大男人被人公開諮詢兩句就淚灑當場，真係冇眼睇。有人重話，其實呢兩年有唔少愛國學校學生入咗港大，唔通真係冇啲好少少質素嘅學生出嚟選咩？


E-mail：[email protected]