當年今日

股壇瀏覽器:中移動托價有新招

蘋果日報 2002/01/30 00:00


阿虎諗死中移動(941)唔識得反彈,點知佢噚日即刻反彈畀阿虎睇,簡直睇到阿虎眼都凸埋,如果有沽期指就真係俾佢挾死。
吳部長話,短期內唔會發第3個移動電話牌照。呢啲都只係舊聞冇咩新意,跟住市場又傳中移動會派息,除非中移動唔再收購阿媽資產,否則冇可能會派息,如果喺呢個時候唔再進行收購,投資銀行可能就唔再需要維持秩序,股價可能跌得更殘。
噚日中移動失驚無神急升,照計都係同挾淡倉有關居多,港股升至11000水平就出現爭持,相信今日期指結算價都會維持喺呢個水平。

吉化傳蝕10億
繼儀征(1033)與上海石化(338)發出盈警後,吉化(368)亦話可能虧損,而且重傳到話虧損成10億元人民幣㖭。嘩!係真唔係真呀?之前嘅化工股出完盈警後就反彈,但吉化就急挫5.2%,沽盤又以中資為主,好似有啲嘢喎。
同仁堂(8069)近期股價走勢處於蓄勢待變格局,最近公司請咗班分析員北上吹水,相信短期可能會出現一啲令市場人士注目嘅消息,小注投機吸納都有得諗,可能有機會過肥年。
阿tom(8001)入股青島春雨後,股價急升11%,直逼4元水平,時富與光大買盤異常積極。不過i師傅話,今次攞唔到控制權,似乎反映佢銳意擴展國內媒體業務上有啲阻滯,唔知班外資大戶點睇呢?e莉莎急急插嘴話,大戶點睇一啲都唔重要,因為無咩外資大戶有貨。