馮仁昭四圍超:劉鑾雄、Yvonne英國過年被監視

蘋果日報 2002/02/14 00:00


大劉劉鑾雄同屋企人去咗歐洲過新年,同行嘅重有最近話係佢身邊嘅紅人、前華置職員Yvonne。前日年初一,馮仁昭打電話同大劉拜年,馮仁昭聽佢把聲唔多開心,問佢係咪有乜嘢事,大劉呻話除咗上個禮拜五(即二月八日),佢同Yvonne喺香港機場入禁區嗰陣有記者等影佢相之外,去到英國咁遠,都發現有記者跟咗過去,佢同個女去百貨公司買嘢,都俾人跟住,覺得好冇癮,想開開心心咁過年都唔得。

知道住邊間酒店
大劉之前都講過,自己嘅行蹤成日俾人知,係有人搞事。今次去到英國,連住邊間酒店記者都一早知道,當然又係有人放料啦。大劉知道喺機場等同埋跟去英國嘅係同一本周刊嘅記者,而放料嘅亦都係同一個人,但佢強調所講嘅放料人,並唔係佢前妻寶詠琴。

翁虹偕未婚夫泰國度歲
喺大陸拍緊劇嘅翁虹,趁新年空檔返咗嚟香港,但逗留咗一兩日,年三十晚佢又同未婚夫迫田正己去泰國過年。迫田正己係專程由日本嚟香港,同翁虹會合後一齊去泰國。佢哋兩個嘅異地戀情可以維繫咁耐,除咗不停講長途電話聯絡之外,就係一有空檔就見面解相思之苦,早排迫田正己都去過上海探翁虹班。見翁虹感情生活咁好,馮仁昭都戥佢開心。
金慧英Sell風水物當行善
金慧英喺尖沙嘴開咗間精品店,最近重賣埋風水嘢,包括夫妻和順、身體健康、招財進寶同埋學業進步等。金慧英同馮仁昭講,佢本身唔係好識風水,不過最近有一個師傅幫佢擺咗個夫妻和順風水陣之後,佢同黑仔姜皓文就少咗嗌交,因為覺得有用,所以佢同個師傅合作賣埋風水嘢,每款賣三百幾蚊,重會捐部分出嚟做善事。佢重話賺錢都係其次,最緊要幫到人,所以覺得自己做嘅嘢都幾有意義喎。

陳浩民取代古巨基
瓊瑤創作嘅《還珠格格Ⅲ》籌備經年,搞到近期已經漸有眉目。馮仁昭聽聞瓊瑤近來對陳浩民十分賞識,一來係因為陳浩民嘅古裝扮相唔錯;其次係佢主演嘅《天龍八部》同《封神榜》,喺台灣播映時反應理想,加上早排佢幫北京中央台拍咗套黃金檔劇集《銀鼠》,令佢喺國內知名度大大提升。基於種種原因,所以瓊瑤就寧願搵陳浩民做《還珠Ⅲ》嘅男主角,而暫且棄用愛將古巨基。

黃澤鋒斟茶遞水冧客
黃澤鋒喺尖沙嘴投資開設嘅「麻辣小喇叭」,眨吓眼都開咗成年。佢間舖喺晚飯時間周不時爆棚,而馮仁昭都係覺得抵佢發嘅。
因為黃澤鋒好明白力不到不為財嘅道理,除咗返無綫開工之外,佢幾乎晚晚都喺舖度打躉,親自招呼熟客,斟茶遞水乜都做,佢咁博,舖頭生意梗係滔滔咁嚟啦。