當年今日

精明消費:
扮鬼扮馬趁墟駱克道變街頭嘉年華

蘋果日報 2003/12/28 08:00




呢個名為MardiGrasParty的嘉年華會,由即日起至2004年2月29日,每個周日都會喺灣仔駱克道(盧押道與分域街地段)舉行,而這次嘉年華會所獲得的收入,將會捐助香港單親協會,有嘢買又有得玩,非常有意義,如果今日得閒的話,不妨去趁一趁墟!

派對用品抵買
羽毛眼罩及心形閃燈棒
想在除夕夜打扮搶眼、引人注目的話,呢個派對眼罩一定是你的首選。整個眼罩均用彩色羽毛組成,橙色配紫色鮮豔奪目,眼圈位置還有藍色珠片圍邊,經濟超值。另外心形閃燈棒亦是值得推介的玩意,只需2粒AAA電,紅心就會閃呀閃,備有紅色及銀色兩款。
各款羽毛彩帶
一條彩帶是最簡單又最搶眼的點綴品,呢個攤檔都有唔少款式任你揀,淺藍、紫、白、綠、黃等顏色應有盡有,戴上身可以裝飾襯衫之餘,包住條頸又夠暖笠笠,如果要買多種顏色的花色羽毛彩帶就要貴多10蚊。
彩色噴條炮
有特大、大、中及細共四款的彩色條炮,亦是派對狂歡的必需品。檔主話彩色噴條炮可以射到三層樓高,滿天碎紙的一剎那十分壯觀。玩法極似爆竹的彩色噴條炮只可使用一次,用完即棄。當日見到檔主不時射幾支上天,成條街的氣氛當堂High晒。
香味圓柱蠟燭
一盒有兩支蠟燭,有薰衣草、香草、花香等氣味,備有六種顏色選擇。每支蠟燭約可燃燒八小時,乃除夕食大餐的餐桌最佳點綴品。
尋找其他特色攤檔
十二生肖玻璃水晶連木架
出年就係猴年,不如買番套用玻璃水晶及鍍金製成的十二生肖模型應應節。十二隻中國生肖動物放晒喺木架上,檔主為咗吸引市民購買,重送埋個木架並將十二隻生肖黏喺上面,一套齊齊整整,送畀人都唔錯。
各款手工飾物
飾物全是檔主親手製造,有鏈墜、襟針、手鏈、頸鏈、電話繩等,造型特別,材料有貝殼、岩石、海星等,夠晒天然,繩索可以免費另配,總之揀啱為止。
好玩街頭玩意
閃粉紋身
嘉年華會有攤檔可以即場玩「閃粉紋身」,只要你想要甚麼圖案,檔主就會即刻幫你設計,每次收費$40,圖案可以保留至少一星期,閃令令幾趣致。
魔術表演受歡迎
大會亦邀請到魔術師喺市民面前表演各式各樣的魔術花式,變完兔仔再變絲巾,每位小朋友都看得津津有味。
MardiGrasParty
地點:灣仔駱克道(盧押道至分域街地段)
舉行日期:逢星期日舉行,至2004年2月29日止
時間:1:00pm-10:00pm
備註:灣仔地鐵站C出口,沿駱克道左邊直行至盧押道街口即到。