當年今日

地產Blog:買樓貪會所搵自己笨

蘋果日報 2006/10/13 00:00


𠵱家發展商賣樓,樓盤本身已經唔再係主角,真正嘅主角往往係屋苑六星級豪華會所,同周邊嘅配套設施。不過,正所謂「羊毛出在羊身上」,呢啲設施嘅建築同營運成本,咪又係轉嫁到消費者身上。
精英大師喺《公眾投資168綜合論壇》上指出︰「現在啲新樓玩晒會所,搞到啲樓實用面積少得可憐,話就80%,其實65%都痛冇!所有會所設施會平均計入每戶度!」
話題一開,omaha也大表認同,佢仲鬼咁風趣回應︰「其實好多新樓如果用地毯面積計,都超過1萬蚊呎……我次次去近幾年落成嘅新樓,都俾佢哋啲面積嚇一跳!坐喺梳化,伸直隻腳,係可以用腳趾公開到部電視,唔使用遙控,方便到極!」
大家吹水一輪,精英大師得出以下結論︰「勁嘅會所其實屋主有份,不過就要畀貴啲管理費,之後每玩一樣嘢又要畀錢,真係連骨都食埋!不過都係嗰句,貴買貴賣,只要地產商仲有樓等住賣,佢哋都會撐住個價等出貨,個遊戲好似啲種金黨咁,參與嘅人都知係騙局,不過只要自己唔係最後一個,就賺大錢。唯一唔同嘅係,種金黨無政府撐,好快玩完,而地產商就有政府撐,可以生生不息。」
揀樓要睇會所人流
講開會所,記者最近同一位資深物業投資者傾偈,佢教路,揀樓一定要先睇會所。呢位仁兄話,「睇會所嘅目的,唔係要睇夠唔夠靚、夠唔夠豪,而係要睇有冇人!如果會所平日都迫滿人,證明班住客應該係游手好閒、冇乜運行,咁嘅屋苑唔慌有前途,認真買唔過!」聽落都幾有趣,不過信唔信得過,就由你哋自行判斷。