《神奇4俠》世紀婚禮銀魔閃出

蘋果日報 2007/06/12 00:00


美國漫畫超級英雄唔止打不死,仲係長青兼夾永遠都咁受歡迎。好似已經有40年歷史嘅《神奇4俠》(FantasticFour)兩年前爆冷跑出,新一集《神奇4俠:銀魔現身》(Fantastic4:RiseoftheSilverSurfer)角色、場面、特技同劇情大加碼,實行要吸多啲fans同銀紙! 撰文:戶川淳
由Marvel漫畫改編嘅《神奇4俠》05年首度真人登上大銀幕,初時漫畫迷都對套片有所保留,不過卻全球勁收近26億港元。4俠喺聽日(14日)上映嘅《神奇4俠:銀魔現身》入面捲土重來,經典超型角色銀魔仲會閃耀登場,唔止增加電影睇頭,更加係大出風頭。
原創者爆笑客串
今集神奇4俠已經被視為國家重心人物,成為保衞地球嘅英雄。電影開場就係一幕世紀婚禮,由約雲基芬(IoanGruffudd)飾演嘅隊長神奇先生同謝茜嘉艾芭(JessicaAlba)飾演嘅隱形女俠拉埋天窗,大家要落足眼力睇吓《神奇4俠》原創者StanLee嘅客串演出,佢喺婚禮上出現,扮成派對搞事者,最後被攆離場,非常搞笑。
不過,最緊張都係婚禮進行中有不速之客──銀魔,佢從外星而嚟喺上空飛過,就搞到基斯伊雲斯(ChrisEvans)飾演嘅霹靂火要即時追擊,兩個人極速途經多個國家,由美國華盛頓飛越紐約市嘅高樓大廈,又鑽到霍蘭隧道,繼而飛到倫敦,甚至上海,真係「話咁快就到」。呢場追逐戲由外景拍攝到後期電腦製作,足足花咗40日先至完成。
腹背受敵最惡啃
銀魔既然係今集嘅新登場重要人物,當然就猛料啦!不過上集嘅大奸角末日博士今集都死而復生,佢仲假意同神奇4俠合作,其實就心懷不軌,暗地搞搞震,神奇先生今次腹背受敵,都唔知點收科!
雖然大敵當前,但4俠今集個個感情有着落,最後都可以開花結果,唔止神奇先生同隱形女俠順利拉埋天窗,石頭人繼續同失明雕刻家女友艾莉茜雅好恩愛,就連霹靂火都會媾到將軍嘅靚女助手,唔使再孤家寡人。
人物誌:銀魔大揭秘
銀魔(SilverSurfer)係漫畫經典人物,佢喺66年已經亮相,而且仲係悲劇人物。銀魔擁有由宇宙能量驅動嘅飛行板,能吸引同控制宇宙能量,佢對地球進行惡意破壞,連霹靂火都係佢手下敗將,但大家又唔可以當佢係奸角,因為佢受制於星球殲滅者卡勒提斯,為咗救助佢嘅星球同愛人,佢奉命摧毀其他星球。由於銀魔擁有憐憫之心,令佢陷於正邪兩難嘅處境。大銀幕上嘅銀魔係全數碼CG影像製作,由《魔戒》(TheLordoftheRings)嘅特技公司Weta出手嘅尖端CG,令銀魔更具立體感。