上期《便利》搵部V70玩剪蕉，真係笑死街坊，嬲死摩記！聽聞摩記重派員四圍澄清，話V70個蓋未轉到最頂，係唔可以通話嘅。部機喺今個星期三上市，特別版「C記」價$5,280-$5,380，「橙台」價＄5,080。為咗造勢，過年前派得約100部落香港，過年後先大Lot返貨。特別版只限深藍色，Packing靚啲，送埋背囊、手表同毛巾。王子勸各位心急買家不妨忍一忍手。
另一邊廂，諾記8855趕唔切過年前派街，急就章搵部行貨6500頂上，同樣響今個星期落場。王子拆過機，發覺6500同8310機肉完全一樣，最搞鬼係連分組鈴聲同8310一樣壞咗，要等新Software先搞得掂。行貨價約$3,000，可以上NokiaClub下載鈴聲。
臨尾重有一部愛記T66，今個星期五上市，專門店已接受預訂，定價$2,780，各位荷包有難啦喂！