二人組合Twins、何嘉莉同林建明（大姐明），前晚喺九龍機鐵站奧海城商場，出席倒數活動，吸引接近二千個fans嚟圍觀。
林建明被噓
大班fans都係嚟捧Twins場，所以當大姐明同現場觀眾大玩亞視新遊戲《各出其謀》時，因為時間太長，觀眾一度報以噓聲。而Twins同何嘉莉因為同無綫有歌星合約，佢哋都冇玩《各》遊戲，只係表演同觀眾一齊倒數。
大姐明更自爆去年初曾經同英皇老闆楊受成一家食飯，當時被介紹認識過Twins嘅鍾欣桐，大姐明話：「我當日重想叫佢哋參加沙灘小姐，估唔到佢哋𠵱家咁紅！」而大姐明老公曾展章係Twins嘅擁躉，佢為𠱁老公開心，前晚叫Twins喺張相簽名送畀老公，Twins好識做咁喺相上面寫咗送畀「親愛的展章哥哥」做上款。
佘詩曼堅決不退股
佘詩曼（阿佘）噚日喺電視城拍《洗冤錄Ⅱ》，對於安德尊嘅龍珠日式料理被追討欠租一事，佔有股份的阿佘就話唔會退股。阿佘話：「𠵱家都冇乜大問題啦，佢哋會處理。其實我都唔知點解會畀股份我，你哋問番佢，基本上我自己都有畀錢出嚟，至於幾多錢就係秘密，而我同安德尊仍然係朋友關係。」
學友、馬英九合唱賀新年
張學友前晚大除夕，喺台北市政府前嘅廣場，出席跨年晚會，而台北市長馬英九重同張學友率先喺晚會開始時登台演出，兩個人重合唱一曲《祝福》。現場有幾萬個市民圍觀，氣氛極之熱烈，只見學友前晚仍然留鬚，一副好man嘅樣。
古天樂賣人情續約無綫
早兩日同古天樂通電話，古仔話上個禮拜已經正式同無綫簽咗兩年經理人合約，一年重會幫TVB拍一套劇，其他時間就會主力用嚟拍戲，古仔話今次決定續約係因為無綫藝員部經理蕭笑鳴（芭姐），佢兩個關係情如母子咁，所以芭姐要求佢留番喺無綫，最後佢放棄喺出面自組公司。
《哈利波特》聖誕片王
電影《哈利波特──神秘的魔法石》上咗十三日，票房已過咗三千萬，《千與千尋》亦有成二千萬，認真唔錯，而劉德華嘅《愛君如夢》約收千四萬，《麥兜故事》約收千三萬，《暗戰2》六日約收三百幾萬，幾部聖誕片嘅票房真係榮辱互見。今個聖誕有《哈》片上映，啲觀眾全部湧晒睇呢部片，無疑會拉低其他影片嘅票房。