當年今日

首屆年貨博覽會食串炸昆蟲最激

蘋果日報 2003/01/21 08:00


今次年貨博覽會暨美食節就喺深圳體育館外嘅露天場地舉行,全場三萬平方米,可能係第一次舉辦嘅關係,我哋朝早十點幾到達時,場內已人頭湧湧。博覽會比我預期中大型,場內主要分為餐飲區、購物區、表演區同休閒娛樂區,每區都有清晰指示牌,行起嚟都唔會覺得混亂,行到攰又可以坐低睇表演,值得一去。

美食區
全場最旺
小食檔超過幾十檔,食品包括各地風味小食好似新疆串燒、北京拉麵、燒大餅、冰糖葫蘆、麻辣小食等,檔口前排滿枱櫈,叫完可以坐低慢慢食!
香脆炸蠍子最好食
場內烤肉檔多不勝數,其中以炸野味最激,眼前一盤盤放滿豆蟲、蠍子、蜘了、蠶蛹、麻雀、螞蚱嘅野味串,望見都有少少驚,除蠍子外每串賣?5,檔前大大個字寫住有美容、去火、高蛋白同排毒的功效,有咁多好處你又敢唔敢試?
問負責炸野味串的師傅邊款最多人鍾意食,佢居然話係?10一串嘅蠍子,「用油炸過變得又脆又香,撒上調味料,味道好好。」就在野味旁,有一紙杯載着幾隻生猛蠍子,果然新鮮!
懷舊冰糖葫蘆
一路行不斷見到大人細路個個都攞住串冰糖葫蘆,而且串串都五顏六色,與香港見到的大有不同。原來佢哋用唔同嘅生果做成,如洋桃、士多啤梨、乾桔、車厘茄和桃等,每串都有唔同的配搭,但生果外蘸滿厚厚嘅糖漿,怕肥的話最好另作他選,每串?5。

檔名:北京糖葫蘆
檔號:A183a
密封式烤肉串夠乾淨
呢檔土耳其烤肉的串燒檔,用密封高溫烤熟,串燒在玻璃烤爐內不停旋轉至熟,感覺總比放在無遮無掩的傳統炭爐上來烤乾淨得多。烤肉每串都會蘸上一種自家調製嘅濃汁,有辣有唔辣,而烤肉就有豬、牛、羊三種,每串?2。

檔名:正宗北京冰糖葫蘆
檔號:H29
現場直擊
吳小姐:「冰糖葫蘆每一串都有不同的生果,味道都可以。我覺得今次呢個博覽會搞得唔錯,好有過年氣氛,貨品售價好平。」
購物區
幾十蚊掃迪士尼精品
這檔迪士尼精品,全場所有貨品都係幾十蚊,比香港平成半以上,當中更有不少迪士尼新年產品。好似呢款WinniethePooh的福字咕𠱸和坐墊,WinniethePooh着晒唐裝衫加埋個福字同羊年圖案,夠晒新年氣氛,一於捧幾個返香港,每款售?20。

檔名:深圳市名寶實業有限公司
檔號:E28
銅鐘連首飾盒
呢檔嘅貨品主要以人手做,以藤籃和銅器為主,睇落有少少似香港的赤柱貨色,但價錢就比香港平。呢個由銅做成嘅座枱鐘,原來亦可當作首飾盒,將鐘面打開後可以放置較大件嘅飾物,好似手鈪、手表等,除此之外,鐘下面還有一個小抽屜,最啱用嚟放置小首飾,每個售?280。

檔名:亮亮晶精品
檔號:F23a
神奇仙人掌
呢罐魔罐仙人掌,只要將蓋拉開,將罐底排水口張貼紙撕開,再將成個罐放入水內,等十分鐘仙人掌就會長出,跟住好似種普通仙人掌一樣打理就得,仙人掌重有日出同金琥兩個品種任揀,每罐?16。

檔名:文文精品特賣場
檔號:E25
現場直擊
趙小姐:「我啱啱買咗百幾蚊,都有買咕𠱸,我覺得價錢可以接受,都幾大眾化,整體嚟講全場貨品同食品都幾齊全,食品都好有特色,我希望下一年會繼續舉辦。」
其他好玩推介
擲膠圈贏玩具車
這個擲膠圈攤位遊戲非常受歡迎,畀?10就有八個膠圈,只要將膠圈套中地上面嘅玩具車就算贏,擲中邊份攞邊份,其實膠圈都幾大個,要中都唔算好難,當日就有人連中四個,捧走四架大玩具跑車!
吹氣遊樂場啱細路
場內設有一個小型遊樂場,馬騮仔、堡壘、運財童子等各式各樣造型嘅得意吹氣滑梯和彈床,細路仔見到必定興奮,畀?10入場費就可以任你玩到癲,爹哋媽咪可以放低小朋友慢慢玩,自己就可以慢慢行慢慢揀啦!
抽獎有機會贏電視機
入場嘅時侯每人都會獲派一張抽獎券,就算唔消費都可以參加即場大抽獎,大獎係29吋電視一部,二獎有DVD或者微波爐一個,三獎有紅酒一支,三個大獎之外重有其他安慰獎,但係想抽獎就要有番咁上下耐性,因為人實在太多,所以閒閒哋都排你十幾分鐘。

深圳首屆年貨博覽會及美食迎春廟會
地點:深圳體育館西廣場
舉辦日期:即日起至1月25日
開放時間:上午10時至晚上10時
門票:免費
交通:由火車站搭的士前往約需?25