老父入院病房被偷拍 安仔發火誓追究

蘋果日報 2005/08/12 00:00


許志安的父親上周六因肺炎發燒入院期間,有記者闖入病房偷拍,安仔為此事相當生氣,昨早即由台灣趕返港,表示考慮向有關傳媒採取法律行動。
許志安的八十五歲高齡父親上周六因發燒入院,日前卻因有記者擅自走進其父病房偷拍,身在台灣拍劇的安仔為此大動肝火,昨早更趕返港探望父親,大批記者聞風湧至醫院。
幸阿嫂在場
安仔昨日接受訪問時說:「我爸爸係有肺炎同發燒入咗院,我噚日收到電話,話有記者知道病房密碼鎖嘅密碼入咗病房,唔知佢哋用乜方法知道密碼,我估計佢哋係睇到護士㩒密碼,望吓望吓㩒入去,咁啱我阿嫂同私家看護喺入面,我阿爸就吸緊氧氣瞓緊。
「阿嫂以為佢哋係我朋友,但對方又問我阿嫂係邊個,後來我阿嫂發現佢胳肋底有點紅色光,喺度閃下閃下,原來係攝錄機嚟嘅,佢哋之後放低卡片走人,阿嫂就將件事話畀我聽,我入行咁耐都未試過咁嬲,有時佢哋點寫我,點講我唔好都算,但如果搞到我阿爸,我覺得我係有責任。」
安仔謂他未得悉此事時,曾收到記者來電,問他有關父親生病入院的事,當時他只回答是老人病,還感謝對方關心。
安仔又表示會諮詢律師意見是否該採取法律行動,他說:「我想像唔到個畫面,若果當時我阿嫂同私家看護唔喺度,佢會點對我阿爸?我爸爸有少少心律不正,嚇親就唔好,所以我覺得非常嚴重,我不嬲都以和為貴,但係今次搞到我屋企人,好擔心,呢個係我嘅責任,我好嬲,我會攞錄影帶去諮詢吓,話唔定會採取法律行動。」
望父親康復
安仔今日三十八歲生日,他昨日探望父親後,晚上與友人吃飯慶祝,問他生日願望,安仔說:「希望爸爸身體健康,快啲出院。」問到曾傳緋聞的韓小姐(韓紅)有否致電慰問,安仔說:「邊個韓小姐?」得悉指的是韓紅,他即一臉尷尬,邊笑邊揮手離去。
採訪:卓美娟 攝影:葉君海
empty
許志安講述有記者闖入病房拍攝其老父情況時,表現相當勞氣。
empty
許志安父親(中)已屆八十五高齡,近日因發燒入院治療。
資料圖片