10年前，香港經濟繁榮，當時蔡瀾與無綫合作13集《蔡瀾嘆世界》，食、住、玩都最豪。10年過去，香港走過低谷，苦盡甘來後，蔡瀾帶大家往全球13個地方逛街市，問他為何不介紹香港的街市，原來因為食環署規矩多多，故此最後索性不拍。

已播出兩集的《蔡瀾逛菜欄》收視節節上升，首播一集已擊倒森美和楊千嬅主持的《殘酷一叮》，第二集更追平無綫綜藝節目冠軍《一擲千金》的27點收視（約175萬人收看），雖然13集當中沒有介紹香港街市，但蔡生就約記者在他最熟悉的九龍城街市做訪問。
走在衙前塱道，每個遇到蔡瀾的人都對他帶笑問好，不然就是問何時辦「逛菜欄旅行團」，他都哈哈的笑着回應。蔡生在街市3樓的熟食市場接受訪問，他邊喝朱古力奶邊說：「街市即係街坊先會去嘅市場，充滿人情味，我份人開心就同大家分享，唔開心會收埋，得閒嚟同朋友傾吓偈，就會覺得活落去好有意思。」

買靚嘢靠撞板

蔡生重視「人」，因為整個九龍城街市都有他的老友，所以飲下午茶連記者都叨光免費，經過相熟水果店會送他水果，老友的菜檔沒有招牌，但有他的墨寶，蔡瀾說：「我第一次嚟係30幾年前，由鐵皮屋到露天再到𠵱家多層街市。綜合全香港，呢度可以話賣乜都最好，就算𠵱家好多檔口都賣大陸貨，但點都會有幾檔老頑固堅持賣好嘢。」
問蔡瀾怎樣逛街市，才能買到最新鮮的餸菜？他教路說：「去街市要餓住個肚去先會揀到最想食乜，至於買唔買到靚嘢就要靠經驗，好似我住過一排跑馬地，去街市買兩個唔靚嘅青、紅蘿蔔收26蚊，呢度兩個先6蚊，所以其實都係靠撞板去累積經驗。」

「話我哋阻住人」

蔡瀾帶觀眾行全世界街市，惟獨欠缺香港街市，他說：「我成日幫香港做宣傳，日日都行九龍城街市，之前我帶隊嚟拍，食環署話我哋冇申請，又話我哋阻住其他人，咁咪唔拍囉，我今次真係好嬲。」
滿面通紅的蔡瀾說：「一路等佢哋覆日期，到卒之等到喇，嗰日我又唔得閒，所以成個節目入面都唔會有一集介紹香港。」
採訪：藍文浩　攝影：陳俊強