經紀陳話向小初推介一隻高風險股，問小初夠唔夠膽賭一賭？小初問佢係乜嘢股？佢講咗三個字：中國星（326）。
根據往績，中國星曾經炒到飛起，但科技股泡沬爆破後，隻股併完股又供股，之後已經靜咗好一段長時間，今次中國星翻炒，相信係炒CEPA有利本地電影業。
經紀陳話，基本因素方面佢唔多清楚，中國星早幾日搞過批股，之後交投就變得好熱鬧，佢聽到成班炒家家陣仍未散到貨，股價仍有上升空間。
中國星早兩日以先舊後新方式，定價每股0.52元，配售4570萬股，集資淨額2310萬元。自從批完股之後，股價就一路係咁升，噚日再斬四兩，升4.35%，收0.72元，原來已較配售價升咗38%，並創今年新高。
經紀陳話，表面上接貨嘅炒家賺大錢，但中國星唔係近期流行有息派嘅工業股，所以跟炒嘅人唔會太多，據聞炒家仍然坐住唔少貨，所以應該未炒完，但佢提醒小初，跟炒呢類股份，要承受一定風險。
慕容小初