當年今日

股壇瀏覽器:龍頭股實在唔易搵

蘋果日報 2002/02/16 00:00


馬年紅盤高開,恒指一度升近300點,但最後升幅收窄至只有129點,可能除咗獲利回吐外,亦反映空倉正重新部署,後市不宜過分看好。
活力世界(8100)宣布半年賺258.6萬元,表現叫做唔錯。此股上市時因為認購唔多理想,招股價由0.40元調低至0.32元,聽講貨源畀晒自己友,上市初期股價曾升近0.50元,但之後回至0.35元附近窄幅上落至今。e莉莎話,最近聽聞此股短期內會再開車,因為幕後人士靜極思動。不過,另外又有傳聞話,幕後人士近期好似冬眠咁,乜都唔做,旗下股仔全部唔識郁,唔知係咪水源不繼?

信超人買生化保健股
Cookie問馬年買乜股最好。其實今年旺邊樣,阿虎都唔太清楚,但肯定今年都係不利金融業。外圍近期發生嘅事,無論係阿根廷經濟危機,以至安然等一連串企業帳目問題都似乎關銀行事,壞帳問題將困擾今年銀行股嘅表現。滙豐(005)雖然係隻好股,一向啲人都話有買貴冇買錯,但一樣要小心啲。
93年升市由多隻具中國概念嘅重磅藍籌股帶動;97年升市則由紅籌及國企帶動;99年升市則由科網與電訊股帶動,今年個市由邊類龍頭股帶動就真係考起。若果大家重信李超人嘅話,不妨買番啲生化及保健類股份,或者可能會成為今年嘅龍頭股。
此外,今年值得留意係如果美國經濟復甦,息口將要向上,本港經濟有可能與美國背道而馳兼要捱高息,所以樓市與地產股其實有隱憂。今年《蘋果》為樓市求得上上籤,到底靈唔靈,年底就知道。