外圍下跌，港股低開後反而高收，市底真係好強。恒指重上11300大關，收11303，上升86點，但成交就縮到不足70億元。3月期指低水擴大，收11212，低水91點。
國企股大前日急衝一段後，連續唞氣兩日，噚日大市上升亦起唔到帶動作用，國企指數反為下跌27點，跌幅近1.3%。自中央支持「北水南調」嘅態度明朗化後，噚日中資方面已有消息傳出，話大陸資金短期內會捲土重來，初步仍係會做番佢哋揸開嘅股票，但會加多幾隻新目標。
講番去年初，大陸資金以雷霆萬鈞之勢來港，大炒一轉，將國企舞到天高，之後泡沫雖然爆破，但根據可靠消息所知，真正大陸資金所揸嘅貨，九成都冇走過，係一開始就準備揸長線，食大茶飯。

易歸邊升勢隨意發揮
大陸資金揸重嘅股票，舊年炒到㷫烚烚之時，大家都耳熟能詳，家下再重溫一次，對佢哋下一個浪將會郁邊幾隻，有一定的參考作用。
佢哋揸得最多嘅國企，主要係鋼鐵股的鞍鋼（347）、重慶鋼鐵（1053）；電機股的東方電機（1072）和哈爾濱動力（1133）；石化股的儀征化纖（1033）同吉林化工（368），以及江西銅業（358）和公路股的安徽皖通（995）。
至於紅籌方面，大陸資金有揸住中保國際（966）、銀建國際（171）、申銀萬國（218）同第一上海（227）。到去年下半年，佢哋亦有收集首長國際（697）同越秀投資（123），特別係後者，貨量都幾重。
至於新加入嘅目標，有兩隻藥業股，新華製藥（719）同廣州藥業（874），另外石化股加多隻鎮海煉化（1128），以及經緯紡機（350）等。大陸資金特別鍾愛發行股數少嘅公司，呢類股票容易歸邊，升勢可隨意發揮，大家可再作參詳。