聖誕長假前，好淡雙方放慢手腳做嘢，恒指升1點，期指冇升跌，總成交縮剩110億元，較前市再減43億元。
香格里拉C輪9128：香格里拉（069）失驚無神由12.25元彈上13.10元。三兩日間，升幅達2成。高盛出報告話睇14.80元，咁就上咗去。其實，做櫥窗粉飾至係真，公司嘅底質，冇理由會忽然唔同，會忽然好咗。
香格里拉C輪9128係咁意成4000份，金額1張金牛多啲，輪價就由18.6仙飛上39仙，升幅1.1倍，做咗龍虎榜阿1。
喺呢隻輪身上，通街係蟹。今年7月發行，發行價1.24元，最高見過1元9，𠵱家得番兩折。明年2月初夠鐘，溢價7.4%，槓桿率33.6倍（有效13.2倍），引伸波幅29.3%，𠵱家買賣，冇晒意思。
新地C輪9286：上龍虎榜第2位嘅有新地C輪9286，由地底價1仙上到1.3仙，升幅30%。明年2月到期，咪睇乜嘢槓桿率，咪計溢價，淨係睇行使價84.88元，而正股（016）做緊76.35元，大概可以估到，隻輪好難有得剩。隻輪9月面世，發行價38仙，就嚟冇晒價值。唔怪得先一排啲統計，10個炒輪者，輸家佔3/4。
恒地C輪3930：恒地C輪3930上龍虎榜3甲，收8.9仙，升25%，有球半易手。3930下月23日到期，下月17日最後交易，行使價37.08元（正股（012）37元，隻輪略為價外），溢價2.6%，槓桿率41.6倍（有效21.5倍），引伸波幅20.4%。隻輪有啲機會唔使作廢，但亦無謂落注，交投唔多也。
章盛