梁朝偉今晚戴住黑超，以型爆姿態行紅地毯，佢同舒淇負責頒發「最佳新演員獎」。

偉仔表示好耐冇見大家，因為佢自己放緊假，要體驗生活，好多時間喺香港，都係休息為先，之前有少少嘢做，拍戲又做評審，佢又話嚟緊就快開工，拍《擺渡人》，之後仲有一兩個計劃。

問到今年會否多產？偉仔表示：「都籌備緊，拍電影有時控制唔到，有時有幾個劇本，有feel就拍，過往之前拍太多劇情片，太沉重，之後嚟緊幾個計劃拍喜劇，包括嚟緊呢部《擺渡人》，自己有不同喜劇，包括黑色喜劇﹑動作喜劇及愛情喜劇。至於《擺渡人》就係浪漫喜劇。」

獲提名影后的君如，則同陳可辛拖手行紅地毯，陳可辛表示支持君如攞獎。君如每次演「阿金」都有提名，今次已是第三次提名，但未攞過獎，始終可能係喜劇，自己有啲遺憾，佢又話評審通常唔會畀喜劇攞獎，君如又話從影多年喜劇路，有個心願都想喜劇攞獎，未必喺台上攞最佳女主角，想講咁多年自己都係努力。

君如同陳可辛接受記者訪問，問君如今年露唔露先？因為當年佢封金像獎影后時，不慎露點一事，君如狂笑再解釋畀陳可辛聽，問君如今年有冇做足安全措施？因為側邊都幾性感，君如就話做唔做都係差唔多。