智取大市:平到離譜的股份 - 晉佳

蘋果日報 2019/01/04 00:00

智取大市晉佳吉利華晨環球股市

環球股市擺脫輪動熊市,全球進入更全面嘅跌市,當全球股市資金一齊抽緊,情況就似一個雪球向下越碌越大、越碌越快,短期跌勢更難停得到,途中更難回穩、更難有反彈,環球股市亦普遍有跌幅加快嘅迹象,對於等機會嘅讀者嚟講,跌得快又未必是壞事,因此機會可能更早出現。

港股即使指數唔點跌,個股單日仍少則1、2%,多則6、7%咁隊,原因係港股指數夠平,但二三線股只要有返啲質素嘅,估值仍遠離反映悲觀劇本水平。舜宇(2382)跌咗咁耐,中美科技冷戰之下,長遠盈利增長可測性大降,仍賣緊2018年預測市盈率19.5倍。吉利(175)俾大摩唱淡目標價8蚊,現價12蚊相當於市賬率2.4倍左右,如果計普通汽車股下跌周期估值,亦有排未算。講悲觀,股價高位跌咗六、七成,仍未接近非理性跳樓價,之所以沽極都有。

市面上估值跌至離譜水平嘅股票為數仍少,其中一隻較離譜嘅係華晨(1114),講緊290億人仔賣25%華晨寶馬,即使賣完套現再減債至零計息負債水平,將剩餘現金全數派息,都幾乎完全抵得過現股份市值,即係剩返25%華晨寶馬幾乎唔使錢送畀你。不過,離譜個案似乎未夠多,隨住跌市繼續,就會有更多離譜個案出現。

晉佳
http://fb.com/advanceguy1
本欄逢周一、三、五刊出