當年今日

歷史重演助波蘭射垮葡軍
求驗客手記:施莫拿歷克「子承父業」

蘋果日報 2006/10/13 00:00


波蘭前鋒施莫拿歷克喺國家隊前日贏葡萄牙2:1場波,包辦波蘭兩個入球,唔講唔知,原來波蘭對上一次贏葡軍係廿年前,咁啱當年入奠勝球就係施莫拿歷克個老竇胡廸斯美斯.施莫拿歷克(以下簡稱「老施」)。子承父業,一門雙傑為國家射垮葡軍,所以話,宿命呢家嘢真係唔到你唔信。
86年老施隊冧葡軍
時光倒流返86年墨西哥世界盃,當年「老施」嘅入波令波蘭喺F組分組賽贏葡萄牙1:0,係最後攞到小組第3名出線嘅關鍵。計一計數,當年「老施」入波,施莫拿歷克得嗰5歲,個豆釘開始踢波未都成問題,斷估佢當時都無諗過廿年後會同老竇一樣,成為葡萄牙剋星。
講開施莫拿歷克,今次已經係佢連續兩場歐國盃外圍賽入波,而我求大俠發現今屆外圍賽,有唔少球員入開有條路,好似北愛爾蘭嘅大衞希利,前日一腳射垮拉脫維亞,到目前為止北愛爾蘭喺外圍賽總共入4球波,原來全部都由佢入。另一個值得提提係芬蘭前鋒列馬倫,呢匹沙場老馬繼上個月對波蘭梅開二度後,前日贏哈薩克2:0又有「士哥」。照咁睇,有啲球隊主要靠一兩個球員數糊,嘜實永無衰。
「話說波蘭球迷等足廿年,終於憑施莫拿歷克子承父業。如果我係國家隊教練,都會叫負責資料搜集嘅助手昅實,有邊個敵對球員嘅老竇射入過己方,有備無患。」