恭喜晒！甄子丹太太汪詩詩上個月喺多倫多生咗個女。甄子丹早喺上年五月同華埠小姐、鑽石商太子女汪詩詩結婚，當時有傳佢哋係奉子成婚，不過甄子丹就否認，而喺上年底，甄子丹就放低手上工作，飛去多倫多陪老婆待產，上個月佢老婆重生咗個女。

BB女好健康
甄子丹同前妻已經有一個八歲大嘅仔，𠵱家又多個女，湊埋一個「好」字，記者噚日打電話畀子丹個妹甄子菁，得到佢證實。子菁話：「係呀！女嚟㗎，我一直都喺香港，唔知BB係幾時出世，不過就知係上個月嘅事，BB女好健康，雖然我未見過佢哋，不過我已經寄咗張賀卡畀哥哥，恭喜佢哋。」

王菲加入護膚戰團
台灣有消息指王菲將擔任護膚品牌Biotherm嘅代言人，廣告商希望以佢嘅知名度迎戰另一護膚品牌嘅代言人鄭秀文、劉嘉玲同舒淇。王菲嘅皮膚一向都幾好，佢經理人陳家瑛日前用普通話回應話：「阿菲的膚質很好，但從未代言過化妝保養品。一直以來有很多保養品廠商希望找她代言，現在還沒談到這麼多的細節。」

無綫講波主持爆粗
無綫噚日凌晨播映嘅《無綫英格蘭超級聯賽精華》發生爆粗事件，嗰晚馮仁昭睇睇吓波，竟然聽到主持人曾偉忠喺節目中講出「賀年獻金猴」環節名時，竟然爆咗一句「賀年獻×猴」，講完之後重同另一主持蔡育瑜忍唔住笑。噚日馮仁昭打電話畀蔡育瑜，佢話：「唔係有心嘅，喺忙亂中有少少甩啞，係唔小心，監製之後都有提醒。」