花旗個市好反覆，日日都先跌後反彈，唔緊要，港股當佢好消息嚟炒，因為花旗下禮拜好大機會減息，好友一於挾高地產股，恒指昨日就咁樣突破咗30000點關。
砌高個市都係靠地產股，新地（016）上過157.60元，收市企喺153.60元，再升近4巴仙，尾段玩吓震倉再踢高，成交繼續暢旺，下禮拜可以試穿160元。長實（001）都唔失禮，收市企喺145.50元，升5.2%，尾市掃得好勁，下禮拜一可試150元。

國內股市前日跌好多，昨日上晝仲有沽壓，不過食完晏返嚟唔同晒，掉頭炒上收復失地，睇嚟就算呢兩日國內有乜嘢宏調措施，都應該已經消化咗部份，下禮拜一A股如果炒上，對港股就好有利。
花旗嗰邊等緊聯儲局議息，暫時都應該係觀望格局，港股啱啱破30000點關，只要花旗股市冇乜大變，應該唔會影響港股向上個勢。
太AC輪9070：太A（019）喺90至100元之間已經反覆咗好耐，昨日終於突破100元關，變身「紅底股」，升破104元，就過咗「假突破」嘅危險期，上望115元。玩太AC輪可以買啲9070短炒，隻輪昨收1.38元，槓桿率7.3倍（有效6倍），對冲值0.79，正股升上115元，9070應該會喺2.60元樓上，就算升到110元，都有超過5成升幅，正股跌穿97元沽出止蝕。