昨日淡友佔盡上風，恒指萬一點大關終於失守，尾市雖失而復得，但市場已轉弱。恒指收市11036，大跌186點，期指收10995，低水41點。噚日滙豐（005）除息，期指已由「假低水」變成「真低水」。
恒指已跌穿10日線（11223），形勢轉壞，暫時11000至20日線的10949水平係重要支持區，能否守得住，要視大戶心意而定。盈富（2800）第2季推出60億元，短期確實有利淡效應，大戶不惜將個市推低而食貨，而邊個位係適當水平，由佢哋話晒事。
滙豐除息，恒指已唔見77點，加埋滙豐噚日又下跌0.74元，單佢一隻，已令恒指唔見近百點。另外，中國移動（941）下跌0.4元，又唔見27點。單係呢兩隻大藍籌，已佔咗跌幅近7成。特別係隻中移動，由頭到尾都係幾家大行在交波，搓來搓去。今時今日造淡，就攞佢嚟開刀；他日要造好之時，一樣可以砌番佢上去。

伺機買大藍籌Call輪
大藍籌陸續派成績表，噚日有電盈（008）同恒地（012），今日則有長實（001）及和黃（013）。電盈2001年營業額219.59億元同盈利18.92億元，比市場預期的略佳，每股盈利8.46仙，往績PE24倍，比中移動為高，估計短期股價會在1.90元至2.2元間上落，宜低吸高沽玩波幅。
今日長和宣布，市場已普遍預期兩家公司盈利均下跌6至7成，若如所料，對股價將不會帶來太大影響。長和同多隻大藍籌股一樣，走勢形成一個大型頭肩底，目前正在營造右肩，只要短期內股價不大幅向下突變，則在衝破頭肩底頸線後，將會出現急升。
看好第2季市道，可在大市完成調整後，博入大藍籌的認購輪，有機會食大茶飯。長實可吼9063；和黃有兩隻，9097及9110；滙豐睇9030；中移動就揀9029同9044。