紐約市長彭博嘅助手揸住市長嘅座駕─大凌志─俾一男一女截車搶走咗，可以話俾賊人剃晒眼眉，呢類事件相信在紐約日有數起，只不過市長成為受害者，先至變成新聞而已。
貿易S鍾意到外地租車自由行，去到一般遊客去唔到嘅地方，自得其樂。有一年某次佢揸車漫遊華盛頓州，停車在郊外路旁拍攝風景照片，竟然有成六七個司機停低架車問：Doyouneedhelp？（使唔使幫手？），因為呢班好心之人誤以為貿易S拋錨，架車死咗火也。華盛頓州啲居民先至咁純樸啫，紐約客就會驚路旁「壞車」係一個打劫陷阱。在中國公路飛馳，貿易S就話佢唔敢停低架車幫人，怕俾人謀財害命也。
貿易S在華盛頓州聽到一個「神話故事」，故事教訓就係我哋要幫人，唔好自私，置他人於困難而不顧。故事係：某農民駕車經過一條路旁風景絕佳嘅鄉野小路，見一架唔起眼啲大車停低，男女兩人徬徨無主。鄉民發揮守望相助精神，立即停車問：Doyouneedhelp？男女話：「我哋架車爆咗軚，但我哋唔識換軚。」鄉民就識啦，幫佢哋換妥後備軚，男女千多萬謝，問鄉民攞電話地址，話以後有機會送番件小禮物以示謝意。
幾個月後，鄉民收到銀行電話：「有人送大禮，同你還清供樓嘅按揭。究竟你幫咗呢位超級富豪乜嘢？」鄉民已經唔多記得，問：「富豪叫做乜名？」銀行職員話：「蓋茨！」