聽日元宵佳節，好多情侶同恩愛夫妻都趁前晚星期六出去食飯慶祝，前晚蘭桂坊就有李妮偕肥仔男友及一班朋友一齊去蒲，趙雅芝同老公黃錦燊及一班老友，又有鄒世龍同腹大便便嘅老婆唐浩雯，佢兩公婆約埋張堅庭同楊諾思夫婦食飯，全部都成雙成對，重有樋口明日嘉同個女朋友，認真熱鬧。
婚後收山
李妮講到同肥仔男友嘅婚事，佢話：「我父母好早離婚，我對婚姻都失去信心，不過我哋計劃五年後結婚，𠵱家以事業為重，結咗婚之後就唔會做嘢。」
黃錦燊同趙雅芝呢對稀客出現蘭桂坊，黃錦燊話佢自從轉做律師之後，為形象都唔會拍番戲，至於情人節，佢去咗日本公幹，順便同埋老婆去玩咗一個月。唐浩雯下個月就生BB，兩公婆重出嚟蒲，鄒世龍話要畀老婆呼吸新鮮空氣咁話。
陳司翰派英倫餅仔
陳司翰（Victor）噚日喺維園出席港台活動「新世紀．新東區滅罪音樂會」。Victor個朋友早前到蘇格蘭旅行，噚日佢大派由當地買返嚟嘅餅乾。佢話最近有fans同佢訴苦，經常俾保安人員用暴力對待，Victor話：「其實我都有同啲fans講，叫佢地小心啲，我都唔想佢哋會有損傷，有時我都唔知道佢哋整親，我都會有啲內疚同擔心。」
光頭仔靠葛民輝變身
黃百鳴所開嘅「東方娛樂」，唱片部會喺下個月開始運作，而東方旗下嘅歌手，雖然暫時只得黃百鳴嘅愛將「光頭仔」王嘉明，但黃百鳴就下令全力催谷，佢重搵咗好有潮流觸覺嘅葛民輝，幫光頭仔做形象指導，希望洗甩光頭仔嘅童星味，將佢變身做一個有時代感嘅歌手。
金慧英不甘被屈炒泰傭
𠵱家請工人真係唔容易，好似金慧英請咗兩年嘅泰傭，做到啲嘢亂晒籠。
有次佢哋兩個嘈起上嚟，個泰傭推撞咗佢一下，但就惡人先告狀大嗌話金慧英打佢，金慧英最終決定炒咗佢。
鄭少秋擔心肥姐健康
鄭少秋（秋官）噚日喺電視城為節目《同心行動見光明》綵排，遇見林敏驄（右），秋官得知肥姐沈殿霞膽管炎，就即刻話：「我都有勸佢小心身體，搞到囡囡同個個都好擔心佢，總之話佢聽要保重身體啦！」另外，秋官在今年六月會為無綫開拍一套古裝劇，佢話𠵱家正積極練習騎馬同埋耍劍。
曹達華重有出頭天
曹達華日前帶埋個得意徒弟安德尊，去搵佢嘅多年好友鍾應堂，華叔話佢呢位好友係一名相士學家，推算命理相當準。好似上年佢話華叔會得到佢一生人最大嘅獎項，咁佢就攞咗金紫荊「終身成就獎」，而今年就批華叔如果肯發奮圖強，就會有出頭天㗎。