爆相爆片:蒲友散band反轉港鐵

蘋果日報 2019/01/04 00:00

港鐵吸煙幕門油麻地站

一班南亞裔男女喺中環夜蒲之後散band,唔知係玩到未回魂定係漠視規例,竟然喺港鐵車廂食煙、推撞,仲要踢幕門,唔係覺得自己咁樣好型吓嘛?讀者Thomas前日朝早6點幾,喺蘭桂坊通宵夜蒲後搭港鐵去旺角,佢同嗰班南亞裔男女一齊上車,目擊晒佢哋嘅惡行。
empty
【煲煙】
手戴粗金鏈嘅「大佬」喺港鐵車廂肆無忌憚食煙。
乘客嚇到急急腳避開
其中三個男嘅坐喺Thomas對面,中間着住黑色西裝外套、黑boots、手戴粗金鏈好似「大佬」咁款嗰位,竟然喺車廂食煙,其間支煙跌咗落地,佢非常慳家咁執返起!鏡頭一轉,嗰班男女突然同另一班南亞裔男女嘈起上嚟,兩班人你推我撞,車廂入面嘅乘客急急腳避開,雖然聽唔明佢哋嘈乜,但聽語氣都知好重火藥味。

呢個時候,列車已經去到油麻地站,開始廣播「please stand back from the train door」,準備閂門,煲煙男一行五人急急轉身落車,其中染橙色頭髮嘅同伴仲回頭向對方手指指,同行金毛女伴用力拉住車門,令車門彈返開,橙髮男仲一腳踢開月台幕門,等「大佬」可以落車。

橙髮男跟住「大佬」行出月台,當佢哋以為用咗最有型嘅方法離場嗰陣,其餘兩男一女同伴就落唔切車,車門又閂咗,金毛女邊拍車門邊爆粗,橙髮男夾硬拉開車門,金毛女幫手令到車門再打開,終於齊齊落車。未到站嘅Thomas聽返仲喺車廂嘅另一班男女講,兩班人本來唔識嘅,但前一晚夜蒲嗰陣曾經嘈過交,點知喺港鐵狹路相逢,有人撩交嗌。

港鐵就話冇呢件事嘅紀錄,亦冇收到乘客報告,唔清楚實際清況,但提醒乘客港鐵範圍嚴禁吸煙,車站當眼位置已經貼咗不准吸煙告示,如果乘客見到有人喺鐵路範圍食煙或行為影響到其他人,可通知職員採取適切行動。
empty
【踢幕門】
「大佬」一行人掛住嘈交趕唔切落車,橙髮男飛腳踢向月台幕門。
爆相爆片
爆相畀$500、爆片送$1,000嘅基本獎賞外,仲會選出每周之星,每星期最高單日總點擊頭5名即刻科水$10,000,而每月15號至翌月14號期間獲得全月最高單日總點擊者,更可以成為每月盟主,額外獎賞$100,000,係$100,000!爆相爆片必須為本報獨家採用,一經刊登立即有獎!

爆相爆片WhatsApp:6383 6568
參加細則
1.爆相爆片必須由參加者拍攝。
2.若本報發現任何造假情況,將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利,如有任何爭議,以本報決定為準。