當年今日

一味窩輪:趁調整收集Call輪

蘋果日報 2002/08/02 00:00


期指持續低水,有人認為係預先反映滙豐(005)同恒生(011)除息,呢個理由是否成立,見仁見智,但昨日大市被期指拖跌,則係事實。
東亞(033)業績只及市場預期下限,期指午市順勢帶住個市跌。不過,恒指仍守10日線之上,形勢未算太差。
美股走勢其實唔錯,前晚公布嘅經濟數據遠遜預期,但杜指同標普500指數都能夠先跌後升,後市唔係咁淡。如果外圍向好,滙恒下周一公布業績又冇「意外之驚」嘅話,港股後市可望做番好啲,𠵱家不妨趁低收集Call輪。
收集對象之一,係長實(001)嘅Call輪。長實昨挫1元,收報60.75元,但技術走勢並非太差,9RSI已率先升破5月延伸下來嘅下降軌,MACD亦將發出買入訊號,估計現價已有支持。
炒友玩長實Call輪,多數會揀9252,貪佢成交旺,但隻輪下月初到期,溢價仍達6.9%,雖有接近20倍槓桿率,仍係稍貴,宜炒不宜揸。

9413唔算太貴
想揸耐啲又唔怕意頭唔好,9413可以諗吓,溢價雖係20.7%,但重有半年期,槓桿率16.2倍,唔算太貴。
章 盛