購物焦點：
HelloKitty出激新家電挽頹勢
Kitty近年的聲勢，給新晉卡通人物搶去不少風頭，眼見江山不保，決定搞搞新噱頭力挽狂瀾，誓要將江山搶回來。以往主攻精品路線，今年轉軚玩家電，所以最新登場就有多款家庭小電器，佢哋不但設計特別，而且重有實際用途，放在家中既美觀又實用，唔講咁多住，即刻去睇吓先。
記者：黃秋燕
攝影：林栢鈞、陳穎
ImageGirl：Monique
樂聲迷你洗衣機
這部新鮮滾熱辣由樂聲牌出品的HelloKitty洗衣機，咪睇佢Size細細，外表唔似洗衣機就以為佢無料到，其實佢大約可以洗兩件襯衫，如果Size比較細的衣物如內衣等則可以同時洗10件左右，雖然洗得唔多衫，過程又要倒水又要裝水不大方便，但勝在係Kitty家電，麻煩啲都無所謂啦！
用法：
1)放入洗衣粉及衣物，然後調校洗衣時間（一般約5-10分鐘）及轉動速度。
2)清洗完畢後，將污水由蓋頂孔位倒出，然後倒入5公升水作過水程序，同樣需要調校5-10分鐘清洗時間及轉動速度。想乾淨啲的話，可將過水程序重複兩次。
新鮮空氣源源不絕
家陣空氣污染咁嚴重，就連屋企都未必有新鮮的空氣，放部空氣清新機就可以幫到你。這部Kitty最新的空氣清新機，就算室內面積達500呎都適用，內附隔塵網，可減少空氣中的塵垢。再加埋大大個可愛到暈嘅HelloKitty公仔頭，Fans見到佢一定愛不釋手。
多用途磨碎機
這款HelloKitty多用途磨碎機，話明多用途當然好使好用，可以磨碎肉類、生果同埋豆類等，磨到碎一碎完全不成問題。小記覺得用嚟磨黃豆整豆漿就最好，平時飲埋咁多唔健康嘅飲品，得閒的話自己炮製新鮮豆漿，既健康又美味，想擁有美麗健康就話咁易。
好玩煮飯仔冷麵機
這部相當別致的冷麵機，外形好似一個面盆，只要放凍滾水在盆中，中間的旋轉摩打便會不斷製造水流，將已熟的冷麵放於水流中，可將冷麵冷凍，並可隨時夾來食，小朋友用來玩煮飯仔至啱，而粉紅色透明膠碟，可放上不同的冷麵配料，如青瓜、蟹柳及葱粒等，朋友仔開Party一定受歡迎。
吸塵好幫手
呢款由樂聲牌推出嘅HelloKitty最新吸塵掃把，雖然扒頭得一個Size，唔能夠作全方位吸扒，而且塵袋比較細，好快就會滿瀉，但佢外形夠晒輕盈嬌小，唔似一般吸塵機有一大嚿機身跟住，吸起塵上嚟就零舍活動自如，只要將扒頭放在叉電器叉足電便可使用。
冷熱兩用雪櫃
如果話雪櫃是每個家庭不可缺少的家電之一，相信都冇乜人會反對，呢部Kitty雪櫃，細細部大約可以放六罐汽水，若果紙包飲品都可以放到10盒。如果小記有部，一定會放喺房中，做嘢做到攰攰哋，隨手便可以攞到嘢飲提提神。而這部機最特別的地方是可以冷熱兩用，溫度由5度至65度，夏天時可以雪凍飲品，冬天便將佢調校至高溫，熱辣辣的飲品便可品嘗到。
有型迷你Hi-Fi
這款KENWOOD出嘅Kitty迷你Hi-Fi，外形夠Cyber，有CD、收音機加MD，重有錄音功能，音質方面都算唔錯，放喺間房度聽音樂就一流，紓緩一下平時緊張的生活。附有Kitty遙控器一個，唔使郁都可以隨時收聽美妙樂章。
店舖資料：
JCShop（31022783）銅鑼灣時代廣場833號舖
秋田館（23868533）深水埗鴨寮街244號地下
上品堂（23855884）旺角彌敦道580A號潮流特區2樓2號舖