當年今日

股路縱橫:注資樓梯響中化快衝上

蘋果日報 2006/10/13 00:00


中化香港(297)噚日有一手大成交,2500萬股成價2.77元,總值約6900萬元。
據所收消息,中資股有兩隻正安排注資,除噚日所講的中保國際(966)外,另一隻就係中化。中保注資,可能要等三幾個月,但中化就會快好多。
早前中糧(506)宣布重組同分拆,股價應聲彈升,由5.50元升近7元,3日內升27%。中化注資嘅「晒士」亦係以幾十億元計,好事一近,相信股價亦會有20%至30%嘅升幅。
中化噚日收2.83元,升4仙,成交大增到近3400萬股。4個月來,中化股價在2.60元至3.05元間反覆上落,近日升破10日線(2.74元),而20日、50日同100日線在2.84元至2.87元,若升破MACD亦會出現入貨訊號,中期上升大浪確認,初步目標係徘徊區頂部3.05元,整固後再上,可見3.50元。
PE低於國際同業
中化係中國最大的化肥產品分銷和生產商,分銷網覆蓋全國21個農業省分,佔75%耕地面積,大股東中國化肥集團持有的3項化肥業務,包括青海鹽湖鉀肥18.5%、山西天脊40%同山東肥業60%權益,好快可落實注資,全部完成後,集團的產能將可由現時的300萬噸增至800萬噸,分銷網點由1100個增至08年的2000個,而市場佔有率由現時的12%升到24%。
中國化肥集團亦持有青海鹽湖鉀肥母公司鹽湖集團25%,日後亦會注入中化。鹽湖集團係內地最大的鹽湖化工產業,其中氯化鈉、氯化鉀、氯化鎂和氯化鋰等儲量係全國最多,綜合開採價值逾12萬億元人民幣。
中化06年(12月年結)每股盈利估約18仙,07年上升至23仙,預測PE12.3倍,與國際同業平均的20倍相比,大為偏低。高盛報告就指中化利好因素甚多,維持「跑贏大市」評級,目標價3.80元。
郭兆誠
empty