睇《信報》張立專欄「商心國是」經常有得益，世間事，不如意者常八九，不必太過介懷。譬如張立喺七月二十四日寫得意與失意，笑中有淚，過癮之至。何謂得意，張立引宋人詩：「久旱逢甘雨，他鄉遇故知，洞房花燭夜，金榜題名時。」何謂失意呢，今時今日嘅香港，就係「老公包二奶，供樓逢失業，買中破產股，無端中沙士」，如果碰到一位女士，中晒呢四件事，該煨咯；如果你一件都中唔到，恭喜晒，你仍然相當有運。
所以話，我哋對目前環境唔好，無須長嗟短歎，咬緊牙根，踏實做事，時間始終會沖淡一切。近日收到啲應屆中大高考生來電郵指「大學收尖子」，好唔公道，憤憤不平。何必嬲吖，人哋叻（或者好彩）做咗尖子，唔使讀中七，直入大學，使乜眼紅噃，自己照樣勤力讀書，咪一樣有機會。至於話熱門學科學位俾尖子霸咗喎，讀第二科又點話？左丁山一位校友當年入唔到生物系，嬲到喊，一路喊一路走去讀中文系，後來就係靠中文好，移民美國做語文教師兼圖書館管理員，生活無憂兼知道退休後福利會幾優厚，兩個仔已自史丹福與柏克萊畢業。同佢講起當年，佢笑住話如果真係入咗生物系，或者無此幸福也！
一位讀者Angela問七月二十三日本欄提及PeterPrinciple，佢與同事唔明，要求解釋，寫到呢度稿紙填滿，聽日話你知。