花旗股市上禮拜五急跌125點，成交仲好大，因為花旗證監會話要告最大行高盛，同佢哋以不當手法賣CDO有關。消息一出，股民爭相拋售，港股喺嗰邊嘅ADR價位都受壓，睇嚟全日恒指好大機會試條20日線。
由於港股早過花旗下跌，落到20日線應有支持，粉嶺有地被勾出，大家要留意地產股嘅表現。
華能C輪21670：華能國際（902）上日報收4.6元，跌1個價位。股價喺4.5元附近拉鋸咗好耐，呢隻幾日有炒上嘅迹象，可以收集C輪21670，博正股升上，隻輪現價18.4仙，2010年10月5日到期，行使價5.5元，溢價23.35%，引伸波幅39.08%，有效槓桿率7.07倍，正股升上5元，21670睇29.5仙，正股跌穿4.45元就沽咗隻輪。
俊樺