沾仔記！香港雲吞麵龍頭代表，由40至50年代經營到今天，到今天第三代掌門人楊家樂（32歲）當家，問佢對雲吞麵嘅感覺：「我覺得𠵱家香港搵唔到好食嘅雲吞麵！」
「好多人講起沾仔記，馬上聯想起中環威靈頓街；其實最早的沾仔記，係我阿爺楊華珍喺石硤尾開嘅大牌檔！」好多人有錯覺，以為物價生活指數年年上升，雲吞麵價錢應該貴咗唔少，「猶記得我阿爺、阿爸嗰代，一碗雲吞麵都賣成$15，你都見我哋餐牌只係賣$13，不過相對𠵱家物價、人工、材料、舖租都高咗好多，所以老人家嗰代，一日賣幾十斤麵可以住洋樓養番狗，但到我呢代就算一日賣一擔（100斤），都係僅可餬口！」

麵價下落其實係從98年香港經濟下滑、$10麵出現開始，沾仔記都經歷過黑暗年代：「$10碗冇得做！好多麵舖會將貨就價，咪執笠離場；但沾仔記係金漆老招牌，唔可以咁做，我哋一直用靚料，只好以銷量彌補！」

其實$10麵嘅後遺症遠不至此：「𠵱家麵廠麵價水平好低，來貨價十零蚊賣1斤（約8個麵餅），我哋試勻全港麵廠嘅麵，暫時未有一間令我哋滿意！」楊掌門話沾仔記三代人有個夢想，就係希望用10年時間，可以開設自己的麵廠，完全掌控麵質，到時做出最完美的雲吞麵。

記者：朱崇德　攝影：周旭文

雲吞麵$13

蝦大隻又新鮮，咁多年冇變！好多日本雜誌都大讚到香港必食！平均1成係外國客慕名而來，就係為食呢碗麵。

鯪魚球麵$13

原來阿爺當年做埋粥，忽發奇想將粥料做麵食，於是就諗出這個麵，當年完全原創。

牛肉麵$13

鮮牛麵真係冇得頂！鮮牛、雪牛入口果然味道不同，$13超抵！

沾仔記（28506471）
地址：中環威靈頓街98號地下