中環在線:金管局搞歡送會
賀彭醒棠榮休 - 李華華

蘋果日報 2016/02/26 00:00


本月底「登六」嘅金管局副總裁彭醒棠(Peter),今日正式榮休,告別22年中央銀行家生涯。Peter一向喺局內局外人緣甚佳,雖然人走但並未茶涼,除咗總裁陳德霖稱讚對方作出不少貢獻外,據聞佢嘅同僚,今日黃昏時段,會喺局內先同彭副總搞個farewell drink,各部門員工可以去同呢位高層傾吓偈影吓相,晚上就會喺呢度筵開10席晚宴歡送。
舊年底財資市場公會周年晚宴上,一眾賓架上台獻唱《千千闕歌》,預祝彭醒棠榮休兼娶新抱,已經搞到佢好鬼感動。華華聽講,今晚Peter亦會真情分享,唔知到時佢會唔會講到眼仔濕濕。
金管局噚日亦公佈,彭醒棠退休後,高級助理總裁李達志將接任,但職能分工調整,李氏會負責金融基建與貨幣管理部門,經濟研究則由副總裁余偉文負責 ,另一副總裁為掌舵銀行監理、政策、操守及法規部嘅阮國恒。