消費Blog:1蚊一隻雞 埋單方程式

蘋果日報 2009/03/08 06:00


市道唔好,食肆推出1蚊優惠希望吸引多啲顧客,稻香集團就賣1蚊一隻雞,大件夾抵食,但有網民就話係呃人嘅,仲言之鑿鑿喺網上狂插:「朋友去稻香齋食1蚊一隻雞,配兩碟薑蓉,埋單變咗$99,計法係先收隻雞原價$100嘅加一費,即係$10,再加$1雞價,薑蓉每碟$40及加一,條方式係$11+$44+$44=$99。」睇完呢位網友嘅經歷,好多網民都「嘩嘩聲」,狂鬧稻香搵笨!
小妹聽到咁搵笨,星期日同屋企人去開稻香集團旗下嘅客家好棧晚飯,都唔敢叫1蚊雞,但埋單嗰陣都係忍唔住口質問經理「1蚊一隻雞」呢單嘢,諗住踢爆無良手法。經理即時扯火:「你梗係睇咗篇網上謠言啦,係啲行家惡意中傷,我哋咁大間集團點會用呢啲嗱渣招!」嗰位經理越講越㷫,誓神劈願話1蚊一隻雞絕無取巧。
小妹見佢㷫到辣雞,都費事駁嘴,返到公司向稻香集團查詢,發言人話1蚊一隻雞堅過石堅,光顧旗下稻香、迎囍,最低消費叫一隻雞$1,加$8茶芥,再加一,條方程式係$1+$8+$0.9=$9.9。而光顧客家好棧、潮館,只收$1蚊雞價,不收任何附加費。
搞清楚件事都安樂啲,因為如果咁大間集團都呃人,香港市道仲點會有救呢?不過小妹當晚誤信網上謠言,冇享受到1蚊一隻雞着數優惠,𠵱家都仲好激氣囉!
周日刊出
電郵:mailto:[email protected]