一直備受全球車迷注視嘅保時捷Cayenne，最近廠方終於正式向外公布新車嘅有關細節；新車除外形突出吸引外，分別屬CayenneS及CayenneTurbo型號，佢哋嘅引擎配搭及動力輸出數值亦各有不同，以迎合不同用家嘅需要。
首先由引擎方面說起，CayenneS及CayenneTurbo所採用嘅引擎，同屬一款4.5公升型號，馬力則為340匹（CayenneS）及450匹（CayenneTurbo）；其中CayenneS由0至100公里嘅加速度僅為7.2秒，極速242km/h，而CayenneTurbo則為5.6秒及266km/h，從而可見新車嘅性能表現係幾咁強勁呢！外形設計亦見突出吸引，望落雖與同廠911車系相似，但極富肌肉感嘅造型及闊大嘅輪胎組合，就明顯將其SUV車形象展示出來；可惜廠方未有公布有關車廂布局嘅詳細資料，或者大家不妨忍耐多一會，靜心等候廠方嘅公布喇。