由呢個月開始到十月，每月嘅二十五號，麥當勞每賣出一客早餐，都會捐出其中三蚊畀公益金做善事。噚日呢個「飽滿愛心暖萬家」活動開幕禮，公益金執行主席陳祖澤做咗第一個捐出三蚊善款的善長，由靚女歌星陳慧琳做麥記臨時工，賣咗一客早晨套餐畀陳祖澤。
唔知係咪真的「秀色可餐」，陳祖澤淨係記得畀錢，唔記得食，未免浪費咗啲。
今年捐款情況唔係咁理想，陳祖澤預計三個月後財政年度結束，公益金距離籌款目標重欠四千萬。陳祖澤睇嚟好心急，話自己𠵱家可謂「見錢開眼」，要急起直追先至掂。
佢又話多咗機構競爭善款，公益金就要用「新思維、新方式」，例如今次麥當勞指定要捐畀公益金邊八間機構，就同以前公益金接受捐款後，自己分配的模式好唔同。睇嚟世界難撈，慈善機構都要迎合市場需要先可以生存。
（圖）公益金主席陳祖澤昨出席麥當勞「飽滿愛心暖萬家」活動時，對嘉賓董太照顧有加，連落樓梯都盡顯Gentleman風度，各位男士要學嘢嘞！　成啓聰攝


E-mail：[email protected]