當年今日

地產多聲道:張藝謀執導上海物業

蘋果日報 2002/06/04 00:00


業務遍及藥業、金融、地產及文化藝術等嘅香港錦發集團,主席金展程果然有天大嘅面子,除邀得國際知名大導演張藝謀擔任上海浦西太陽都市花園形象代言人,張大導重親自執導、拍攝宣傳短片,月底推介會上首播。金主席話,張大導對呢個盤好有興趣,重立即預訂一個靚景單位。主席笑言,如果大導將來有好劇本,都會投資。
響月底推介會上,張大導重會介紹新片《英雄》嘅製作花絮,套片以秦始皇為背景,主角係梁朝偉、李連杰、章子怡同張曼玉。
此外,錦發嘅收租物業上海中匯大廈,以前係青幫首領杜月笙中匯銀行的總部,解放之後收歸國有,曾改作上海歷史博物館,錦發響93年買下翻新出租。

中原論功行賞
中原連續3個月佣金收入過億元,禮拜五舉行慶功宴,聽講擺得六七十圍,睇落好似唔夠坐。原來今次只畀做到數,即超額嘅同事出席,做唔夠數者無得食。
世界盃熱潮淹蓋全城,加上由日頭打到夜晚,唔少代理都會偷偷雞「蛇王」睇波。鴻運田老闆索性影印世盃每日賽程畀各區頭,等佢哋知道幾時無波睇,方便開會搞活動。當然,田老闆係蘋果日報擁躉,張賽程表梗係來自蘋果。
蘭西