不滿被揭毛玉萍開記招內幕
大劉爆二五仔之后勾佬

蘋果日報 2002/10/22 00:00


劉鑾雄(大劉)再次出招,今次矛頭直指就毛玉萍開記者會內情,向某周刊放料的上流社會「二五仔之后」,並表示對方因為工作關係經常放料討好傳媒,而她最近更背夫為某唱片公司的總經理生下一子。
和內地富豪周正毅傳緋聞的楊恭如,日前在名店發生了被掌摑事件,其後毛玉萍召開記者會,表示不介意老公周正毅結識任何異性。有周刊報道指毛玉萍約見記者的事件,是一班富豪在幕後角力。

何柱國拉攏
報道稱當晚是星島集團老闆何柱國拉攏,毛玉萍才答應見記者,而劉鑾雄(大劉)除借出其華置辦公室作為記者會場地外,亦親自現身支持毛玉萍,另外在場的有向華強夫婦以及和毛玉萍老友鬼鬼的榮文蔚,而何柱國礙於是傳媒老闆的關係,才沒有在記者會露面。
記者昨日就以上的報道向大劉求證,對於該事件,大劉表示這是他人的事所以不欲多談,但大劉對於報料給傳媒的「二五仔之后」,則氣難平。

暗寸某商人
大劉在電話訪問中說:「城中嘅『二五仔之王』大家都知係邊個,即係早幾日向全港六百萬市民報流料嗰個,但其實重有一個『二五仔之后』,凡對上流社會有啲認識嘅人,都會對佢有印象。嗰晚食飯,我親眼睇到呢個『二五仔之后』打畀一間傳媒報料,話就嚟開記者會,咁啱我又出去打電話,佢一轉身見到我,驚到擘大個口得個窿,我當時唔知佢打畀邊個。」
記者問大劉和「二五仔之后」是否朋友,他說:「見到面都會打招呼嘅,但係佢邀請我出席嘅場合,叫我一千次我只係會去一兩次,而且嗰一兩次都唔係畀面佢,只係畀面佢啲朋友啫!『二五仔之后』因為工作成日要同傳媒合作,名人界好多人都知佢放料,上年我去巴黎,係佢放料;最近同大班朋友做完宣傳喺某酒店嘅中菜廳食晚飯,佢又放料畀某周刊嚟影獨家相。」
是非當人情
大劉續說:「喺呢個『二五仔之后』心目中,犧牲人哋對佢冇損失,成日將是非當人情,但係問番佢,佢就擘大眼話自己唔知,話唔係自己,不過今次佢係斷正喺我手上,唔會怪錯人。佢咁鍾意講人哋嘅私隱,其實佢自己嘅嘢都好有新聞價值㗎,雖然佢已經結婚生仔,佢未嫁之前不嬲鍾意同女性朋友拍拖、搞嘢,點解又唔將自己嘅性取向話畀傳媒聽嚟交換大頭相同大篇幅嘅報道呢?」

去倫敦鬼混
大劉繼續爆料:「今次我就代佢放一單料畀你哋,最近佢生咗個仔,但個仔唔係佢老公嘅,係某天王嘅唱片公司總經理嘅。上次我去巴黎,佢同嗰個人都有去倫敦,佢向傳媒報完料之後就同個總經理去咗CarltonTower嘅房入面鬼混,重搞出人命。
「最慘係佢個老公懵然不知,連幾千蚊驗DNA都唔識。其實『老婆生仔、老竇唔係我』都冇乜大不了,但係最緊要自己知,但佢老公就當自己係經手人,戴咗綠帽都唔知。」