女神tea time:重口味或能救思捷 - Fifi

蘋果日報 2012/09/25 00:00


思捷環球(330)放榜在即,除咗盈利,由Zara跳槽嘅新CEO有乜鴻圖大計,亦係焦點。冇錯,思捷由營銷、管理以至策略各方面都有問題,但唔代表走入末路。成功靠《ATV焦點》上位嘅二奶台,近日再出奇謀搞亞洲男士選舉。菲菲唔知會唔會有盛年、猛男組,但肯定有一組叫「重口味之選」,肥腩、光頭、自信爆棚之另類美男,噱頭十足,選美當日定成亞洲笑點,收視點會唔爆燈?反正已衰到貼地,於是將錯就錯,將弱點變成優點,出奇制勝,唔係ATV先識用。壽司界傳奇明將壽司,亦借呢招化腐朽為神奇。菲菲中學時,明將質素一般,但勝在平。之後其他壽司勢力崛起,競爭加劇,於是反其道而行,設計一批難食、核突,甚至令你匪夷所思嘅壽司,成功出位,更引來一班自詡勇者之士自我試煉,至今依然客似雲來。當ATV成功靠重口味突圍上C1、韓國肥叔叔Psy靠騎呢舞紅爆全球、明將靠難食殺出血路,話唔定思捷明Sell老套賣懷舊,係新出路。Fifi本欄逢周二、四刊出