當年今日

出賣古仔「好友」呼之欲出
馮仁昭四圍超:鄧一君同洪天明唔啱傾

蘋果日報 2002/09/19 00:00


古天樂(古仔)喺本自傳入面寫話曾經俾一個圈中好友出賣,嫌疑最大包括有鄧一君、雷宇揚同埋洪天明。前晚鄧一君出席喺灣仔林百欣電影藝術中心舉行嘅《騎呢特工》首映禮,佢一見記者就話要澄清:「呢個報道一出街,古仔就即刻打電話畀我,因為驚人哋誤會係我,佢叫我同你哋講,如果佢唔當我係朋友,就唔會同我一齊去睇楊千嬅演唱會,我亦唔會去佢屋企打機。

會置身事外
「其實古仔當我、洪天明、林曉峰都係細佬咁,我知佢講邊個,但對方又唔係出賣我,我會置身事外。」鄧一君又話自己同洪天明已經冇聯絡,佢話:「我同佢前女友徐小姐(徐子淇)就有聯絡,但洪天明就冇聯絡,因為大家唔係咁啱傾。古仔同佢有冇聯絡?咁我就唔知啦!」
洪天明呢排就認真多是非,噚日又有周刊話佢介入車婉婉同金融才俊Sherman(李兆文)嘅戀情,話洪天明同車婉婉約埋去蒲吧同去半島酒店飲茶。
過氣肉彈愈嚟愈孤寒
過氣三級肉彈𠵱家喺娛樂圈已經銷聲匿迹,𠵱家靠男人養自己,都叫做唔憂柴唔憂米,以前同佢一齊拍過戲嘅豔星,不嬲同肉彈都幾好朋友,一直有聯絡,但豔星最近就周圍向人數肉彈,話肉彈份人愈來愈孤寒。因為有一次肉彈車完豔星之後,竟然問豔星收番隧道費,咁少錢都要收番,個肉彈又幾孤寒喎!

Gordan送風褸賀Rosemary生日
名模Rosemary男友Gordan同徐子淇等噚日喺尖沙嘴示範秋冬新裝,噚日適逢係Rosemary二十一歲生日,Gordan喺服裝店揀咗件價值七百九十九蚊嘅防風外套畀女友做禮物,問到點同Rosemary慶祝,Gordan話:「未知,或者會搞party,但係佢怕羞,唔想畀驚喜佢,費事整喊佢啦,不過都會送花嘅!」
馮仁昭問徐子淇對於有報道指佢前男友洪天明同車婉婉拍拖有乜嘢感想?佢話戥佢哋開心,兩個人一樣高好合襯,不過子淇承認今次返嚟香港冇同洪天明聯絡。
何伯孫仔開航空公司
香港已故名慈善家何英傑(何伯)最細嗰個孫何定國,最近喺加拿大溫哥華開咗間新嘅航空公司,叫做HMY,大概十一月一號就會啟航,佢哋現階段主要航線係溫哥華飛墨西哥、夏威夷同拉斯維加斯,遲吓重會飛埋香港㖭。
馮仁昭噚日同呢間公司嘅高級經理鄭生傾長途電話,先至知道HMY個名係有段古,首先H字係代表何家Ho,M字就代表何定國媽咪May,至於Y字就係何英傑嘅「英」字Ying。馮仁昭好奇問鄭生,美國九一一之後少咗人搭飛機去美加,點解佢哋重有信心投資?鄭生就話佢老細何定國對經濟有信心,相信長遠嚟講,啲人客一定會返番嚟嘅!

電眼靚仔唱K都怕醜
電眼靚仔成日俾人話佢背住女友去媾女,其實電眼靚仔份人好鬼怕羞,佢份人平時已經好沉默,同老友冇乜點傾偈,一見到陌生人重死,即使佢去朋友屋企,一入到屋見到唔係咁熟嘅人在場,佢就好緊張,望都唔敢望人,一句嘢都唔講就行咗去。有次佢參加朋友個卡拉OK派對,雖然佢曾經出過碟,好鍾意唱歌,但當日佢一上到台唱歌,因為現場有佢唔熟嘅朋友,佢就怕羞到成晚企喺台度背住啲人,但因為又想繼續唱,唔捨得放低咪走,就成晚背住啲人唱咗十幾首歌。當人哋播佢舊歌MV嘅時候,佢就尷尬到耷低頭唔敢睇,認真搞笑。
蕭亞軒等Edison表白
台灣天后蕭亞軒(Elva)早前喺香港舉行嘅個唱雖然反應麻麻,但佢最近喺台灣推出嘅第五張個人專輯《愛的主歌‧吻》就走勢凌厲,前日喺新碟嘅慶功宴度,大家嘅焦點都落喺佢同陳冠希(Edison)嘅緋聞,Elva重首次公開對Edison講「愛的宣言」,佢話:「我承認我對他有一定的好感,他當然對我也有一定的好感,但我不相信他喜歡我,除非他當面告訴我『我喜歡你』。」

羅霖一世唔憂米
羅霖噚日去銅鑼灣,接受皇族金輝泰國香米贊助一世食米,羅霖話佢本身有減肥公司同化妝品公司等贊助,但係今次獲贊助一世食米,就連屋企人都可以受惠,佢好開心咁話:「平時我老公好少讚我嘅,但係佢今次都開口讚我唔簡單,我係名副其實嘅大飯桶,每晚都要食兩碗飯㗎!」

何潤東俾Fans嚇親
何潤東同邱澤等今日由台灣嚟香港,主要宣傳佢哋主演、喺亞視播出嘅電視劇《雪地裡的星星》,佢哋只係嚟四日,所以宣傳活動排得密密麻麻,除咗拍亞視宣傳片之外,重會去各大商場同影迷見面。
何潤東有年多冇同香港嘅fans見面,由於太耐冇見fans,竟然有fans喺佢網站留言話:「如果佢再唔嚟香港,我哋就變心。」嚇到佢即刻返嚟宣傳。