攝影F睇過《明報》張相，再睇吓《壹週刊》嘅相，認為朱總理張相有疑點。佢講咗一大輪，左丁山先至明白一啲，姑作有聞必錄。
朱總理夫婦坐木櫈上，四隻腳有陰影，面位亦有，但係背後嘅泰姬陵就一片耀眼光芒，全無陰影，以攝影F之多年經驗，背景（泰姬陵）與前景﹙朱總理伉儷﹚嘅光線唔多夾噃。
睇吓李鵬夫婦，陽光前後一致，李鵬朱琳坐石櫈，面上無陰影，真係有啲唔同。至於夫人套裝咯喎，朱琳打扮入時，配合身分；勞安就太過樸素，件外衣扣鈕後顯得太窄，唔多似總理夫人外訪印度噃。
左丁山對攝影好外行，聽完就算，唔敢置評，事關攝影F為咗影相，走遍大江南北，半個地球，左丁山豈敢質疑佢嘅意見。
講起攝影，香港好多藏龍伏虎，沙龍攝影藝術名家輩出之外，新聞攝影亦巴閉。美軍轟炸喀布爾嘅第一個畫面，就係兩位以香港為基地嘅波蘭籍、美國籍攝影師為CNN拍嘅。九一一之後兩日，CNN已經叫咗佢哋去阿富汗，日等夜等，卒之等到全球第一個轟炸畫面，佢哋雖然唔係香港人，但亦係居於香港，有呢類人喺度，我哋先至可以話係國際城市。