鈴聲破沉寂官員講多謝
▲噚日賣地氣氛認真麻麻，第一幅地只有華懋競投，結果閃電成交，第二幅雖然有兩發展商爭奪，但亦唔見得熱烈，有好幾口價都係拍賣官再三催促，先至有人承接，會場大部份時間都鴉雀無聲。當香港仔地皮的拍賣承接至7300萬元時，突然傳嚟清脆的手提電話響聲，打破沉靜氣氛，就連拍賣官郗輝城都忍唔住要說：多謝！
細地搶住要莫非玩針對？
▲早前長實李澤鉅一聲令下，話𠵱家做地產要「由底到頂」，佢啲手下就即刻切實執行，係噚日居然連幾千呎地皮都搶住要。長實吳佳慶競投香港仔小型地盤時，舉手快得嚟絕不手軟，搞到市場有揣測，唔通長實同裕泰興有仇？抑或係長實想「打劫」細發展商，幫政府增加庫房收入呢？唔怪得裕泰興代表係投得地皮舒一口氣嘅同時，「超」咗吳佳慶一吓。
副署長公然下令停賣地
▲近日停止賣地的聲音在市場響起，地政總署副署長（專業事務）郭理高（右圖）昨日罕有地在賣地前現身文化中心，自然成為追訪對象，點知一眾記者問到政府停止賣地傳聞時，他竟即時說會立刻叫同事停止賣地。記者驚愕之際，郭理高才正式回應，大家才知被他幽了一默。