雖然阿仙奴近年嘅成績麻麻，不過著名嘅兵工廠球迷頻道ArsenalFanTV（AFTV）嘅成績就相當好，仲成為上年YouTube最多人訂閱同收睇嘅球迷頻道，而且仲獲得相當可觀嘅收入，總算喺英超以外嘅地方攞番個第一。

或者你唔係廠迷，但近年你都應該睇過AFTV嘅節目片段，「暴龍哥」Troopz你亦一定知係邊個。AFTV近年之所以爆紅，唔多唔少都拜兵工廠近年戰績低迷所賜，呢幾年嚟Troopz經常喺賽後接受AFTV訪問，其間成日都勁唔畀面愛隊，邊爆粗邊鬧，令AFTV成為咗廠迷發洩情緒、甚至其他球迷用嚟恥笑兵工廠嘅頻道。

由於上年武漢肺炎疫情，令球壇各大賽事都要閉門上演，類似AFTV呢類嘅球迷頻道就更加多人收睇，據美國博彩公司American Gambler嘅統計，過去1年YouTube最多訂閱人數嘅20個球迷頻道，單計今年1月份嘅總觀看次數就多達6.68億，即係全球大約10%人口都有睇佢哋嘅節目。

據統計數字顯示，AFTV依然係最多人睇嘅球迷頻道，擁有超過130萬位觀眾訂閱，而佢哋嘅點擊率亦相當誇張，總瀏覽次數就多達9.8億次，其中過去12個月嘅收睇次數就已經佔7.77億次，而近30日嘅收睇次數亦都有3,530萬次，3項數字都係排第1位。點擊率高，收入自然都唔差得去邊，據報告指，AFTV每年單係喺YouTube獲得嘅廣告費就已經有120萬鎊（約1,200萬港元），平均每場阿仙奴比賽佢哋都有32,000鎊收入。

雖然AFTV成績超勁，不過佢哋所受到嘅挑戰亦唔少，因為排第2位嘅曼聯球迷頻道The United Stand上年嘅點擊次數增長就多達86%，相反AFTV就只係得26%。另外，曾經係AFTV台柱嘅Troopz上年年底亦都離開咗AFTV自立門戶，成立TroopzTV頻道，仲極速進佔第三位㖭。

雖然AFTV同暴龍哥兩個阿仙奴頻道搞得有聲有色，不過佢哋嘅愛隊就繼續要為節流而煩惱。阿仙奴禮拜三就宣佈同希臘後衞柏柏斯達夫普路斯（Papa）解約，呢位32歲中堅已經成為兵工廠喺1月份第5位被送走嘅球員，睇嚟阿仙奴都冇乜多餘錢養冗員，唔知佢哋會唔會考慮吓同AFTV或者暴龍哥合作拍片，增加番啲YouTube廣告收入？