現年36歲嘅韓劇《懷抱太陽的月亮》女星韓佳人，前年為演員老公延政勛誕下愛女，之後韓佳人就一直專注湊女，只係間唔中為代言品牌拍攝新廣告，直到早前先宣佈復工拍OCN新劇《情婦》，亦係韓佳人繼《懷抱太陽的月亮》後事隔6年再拍劇。

由於老婆韓佳人正為新劇趕工，延政勛就特地送上咖啡車到拍攝現場，為老婆加油打氣，相當貼心。咖啡車公司就喺Instagram公開咗韓佳人收到咖啡車時嘅相，相中韓佳人手持咖啡並對住鏡頭露出幸福笑容，可見兩人相當恩愛。

另外，《情婦》劇組今日公開咗新預告，當中以「有一個男人死咗」嘅字句為首拉開預告序幕，隨後就見韓佳人為首嘅四個女人企喺一個木箱隔離，而箱內似乎有一具男屍，懸疑劇情令觀眾大感興趣。

更多韓流，喺晒《娛果》
http://fb.com/appledailyent