購物焦點：
7大迎春花今年特別燦爛
春天開花就每年皆是，不過今年別有不同，根據花墟花店的老闆透露，今年的冬天較早結束，氣溫自農曆新年後持續偏暖而且沒有雨水，此等氣溫濕度就正提供花朵最佳的生長環境，所以店主們都齊聲話今年的花開得特別燦爛茂盛。我哋更幫你揀選出今年7款較受歡迎、開得特別燦爛的盆栽花卉，不妨買盆返屋企！
記者：許穗齡
攝影：伍慶泉
花卉效應 矮牽牛大熱
售價：$20（山城）
矮牽牛是今年花卉展的主題花，花店店主賴先生話矮牽牛粗生粗養，被選為主題花是寓意香港經濟會於逆境逢生，以頑強的生命力面對困境。傳統牽牛花屬攀藤植物，而矮牽牛則是盆栽，高度只有8至10吋。賴先生又指出，由於花卉展的關係，的確多咗市民購買矮牽牛，入貨都入到手軟！
種植貼士： 矮牽牛粗生粗養，基本上不需要特別照顧，每日淋一次水便可。
玫瑰海棠 花瓣厚花期長
售價：$38（山城）
店主話香港人買花的首要條件，就是花一定要夠多，因此玫瑰海棠都屬好賣貨色，尤其今年天氣絕佳，無論花的數目及品質都非常理想。玫瑰海棠多由本地出產，亦有荷蘭入口的，不過價錢偏貴，一般高度為12吋左右，顏色有紅、紫紅、黃色等，小記覺得呢款黃色帶紅邊的最靚，高貴中帶點清新，最緊要係花瓣較厚身，因此花期可長達一個月，非常襟睇。
種植貼士： 玫瑰海棠本身水分非常豐富，每隔兩至三日淋水便可。
罕有比利時杜鵑 好運財來
售價：$280（山城）
三月是杜鵑花盛放的時節，這款來自比利時名為布洛克杜鵑都同樣踏入花期。布洛克杜鵑，又名好運財來，是近年的新品種，一般高24吋至28吋，最特別之處是花朵生長以一支莖為根據點，再長出約十朵花，有點似繡球花，顏色有粉紅及紫紅等選擇。
種植貼士： 比利時遠道而來的杜鵑，慣於寒冷的地方生長，香港等亞熱帶地方並非理想培植之地。此花絕不能暴曬，最理想是放在天台有陰位的地方，既通風又不會受到太陽直射。
荷蘭杜鵑 一盆兩色
售價：$48（山城）
來自荷蘭的比利時杜鵑，又名利是花或滿堂紅，特別之處是將同種不同色的花種在同一盆，生長時會互相纏繞而生，猶如同一株，這盆就是混合了深桃紅和淺桃紅色的花，顏色出奇地和諧。一般高10至12吋，顏色有桃紅、粉紅及白色等。
種植貼士： 在未有花苞時一次過施肥，下次出芽時便會一次過開花。一般每兩日淋一次水便可，暴曬的話則需每日淋水。
朱頂蘭 靚盡四方
售價：$68（山城）
來自中國的朱頂蘭，絕對合乎中國人口味，首先是花夠大朵，開盡時直徑可達8吋；其次是一支花莖會長出四朵花，分別向着四個方向，無論從哪一個角度睇都係咁靚。一般最高可達2呎，顏色有淺橙紅及深紅色等選擇。
種植貼士： 需每日淋水，應有適量的陽光。
大岩桐 繁殖力強
售價：$15（繽紛）
一般花店售賣的大岩桐多由本地培植，不過店員話原來要培植大岩桐非常容易，只需剪下葉片浸於水中便可。大岩桐一般高8至9吋，屬較細小的盆栽，不過花和葉都偏大，外形都幾有趣。顏色選擇方面有白色、紅色及紫色等。
種植貼士： 花和葉絕不能沾水，要放在較乾爽陰涼的地方，一般3至4日淋一次水便可。
繡球花 色澤夠均勻
售價：$130（繽紛）
天氣除咗對花朵尺寸有影響之外，原來對花瓣的顏色都有，好似今年的繡球花，就是近幾年顏色最靚的一次，花瓣顏色均勻鮮豔，細看之下每一瓣都咁靚。繡球花同樣係本地出產，一般約2呎高，有紫藍色、桃紅色、白色等選擇。
種植貼士： 應隔日淋水，在陽光太猛時要搬回室內。
店舖資料：
山城花藝（23800703）九龍旺角花墟道10A舖地下
繽紛園藝（23815330）九龍旺角花墟道28號地下