原本踏入4月，有唔少汽車代理都會推展新一年新車大攻勢，以刺激汽車銷量，惟近期市況表現疲弱，有部份對旗下新車無信心嘅代理商，都會將原有計劃推遲至五月；有車壇前輩對亞Mark講，話香港車市嘅近況，會係十年間鮮有咁寂靜。然而，靜極思動下最先發難會係德國歐寶代理，早前佢哋經已秘密引入咗全新Vectra車系，聽聞打頭陣會係一款Vectra2.2Elegance型號，馬力輸出除有成147匹之外，0至100公里加速度亦不過10.8秒，設備配搭又見齊全，既有全車豪華皮椅，又有Xenon頭燈、17吋跑車合金胎軨、免提式電話系統，重有雨滴感應裝置、恒溫冷氣同高級CD音響，以及一套5前速半自動波組合㗎！早前，我哋《車天車地》版個四眼編輯，曾遠赴德國作實地測試，並對新車有唔錯評價㖭！若然你對呢部咁有內涵嘅德國豪華轎車有興趣的話，就記得今個周末周日去Showroom睇吓喇！據知新稅下嘅車價，亦不過27萬上落咋！