肥姐沈殿霞自上月先後接受通膽管及切除部份肝臟手術後，至今仍在瑪麗醫院留醫，其前夫鄭少秋雖然曾偕女兒鄭欣宜往探望肥姐，不過他日前接受本報專訪時，直言現時妻子官晶華大晒，更下令禁止他談到與肥姐從前的感情瓜葛，難怪左右做人難的秋官大歎：「做人做到我咁，真係好慘，我一個人受晒啦。」

鄭少秋與前妻沈殿霞及妻子官晶華的三角情仇關係，因肥姐近日留醫而令這段沉澱多年的恩怨再度浮現。上月肥姐先後接受通膽管及切除部份肝臟手術後，一直留醫瑪麗醫院養病，因病情反覆令人十分擔憂，愛女鄭欣宜每天奔波探母，又要獨自面對傳媒，作為欣宜父親的秋官即使有本難念的經，還是站出來與欣宜共度難關。日前秋官接受本報專訪時，言談間可見他夾在兩個家庭之間，手掌是肉，手背也是肉，感到十分無奈。

大呼慘情
「梗係老婆大晒啦」

秋官與肥姐當年的13載戀情，因官晶華介入而畫上句號，肥姐87年誕下欣宜，翌年離婚，秋官即於89年迎娶官晶華，婚後育有兩女，雖然這一切均屬陳年往事，但肥姐對官晶華心懷怨懟，多年來始終放不低仇恨。
秋官近日忙於與汪明荃綵排下月在紅館舉行的「我們的世紀金曲演唱會」，日前他被問到有關與肥姐過去的感情事時，他直言遭太太官晶華下令禁提，他說：「臨出門口前，太太講明有關以前嘅嘢唔准講，有關兩個女嘅嘢唔准講，佢話：『我哋又唔係做呢行，唔好令我哋尷尬，尊重吓我哋18年婚姻啦！』做人做到我咁，真係好慘，我一個人受晒啦，我自己冇所謂，佢話點咪點囉，結咗婚18年，梗係老婆大晒啦。」

曾經呷醋
女兒怪責偏愛欣宜

雖然秋官拒談與肥姐的一段情，但對於肥姐曾指他經常口花花撩女仔，秋官即時自辯道：「自己係花弗老實人，鍾意講吓笑，唔知從乜嘢角度去定啦，中國人講就係口花，外國人講就係幽默，好嗰方面睇係健談同親切。」肥姐表示曾因秋官在她面前撩女仔而感不滿，秋官回應之餘，不忘暗寸多年前曾惹桃色糾紛的何守信表裏不一，他說：「點止女仔呀，男男女女都係咁撩㗎啦，佢自己（肥姐）都係咁啦。你可以話何守信係老實，但原來佢係做花王嘅。我自己實在好專一，只係外表被人誤解咗，不過冇所謂，人人開開心心咪得囉。」
問到官晶華是否因呷亁醋而不許秋官提肥姐？秋官說：「唔好咁講，反而係佢成日提醒我，叫我去探肥姐，去支持吓個女，喺呢個情況下，個女係需要支持，需要爹哋同佢一齊度過難關。」過去有傳官晶華對欣宜態度冷淡，但今次她表現支持，不知秋官是否有意為妻子平反？他說：「唔需要，亂寫嘅嘢由得佢。」
秋官和官晶華所生的長女詠恩已17歲，幼女詠儀也13歲，兩姝近日眼見父親頻與同父異母的姐姐欣宜來往，會否呷醋？秋官說：「佢哋以前好細個時講過一次，點解爹哋對家姐咁好？我解釋畀佢哋聽，家姐好少同爹哋一齊，咁耐先見一次面，會特別照顧佢多啲，𠵱家兩個女大咗都明白，兩個女都好鍾意家姐，好錫家姐。」

網友圍攻
「有心人特登針對」

對於欣宜近月屢遭網友針對，秋官坦言擔心，他說：「係啲有心人特登針對，覺得佢有咁好嘅機會係因為父母關係，啲人唔抵得佢，自自然然會抗拒、打擊佢，我同欣宜講，有批評係好，惡意嗰啲唔好理，真心批評可以用得着。邊有人十全十美㗎？總之自己冇人哋講唔好嘅嘢咪得囉。」
秋官續說：「我會諗啲人點解要咁樣打壓一個十幾歲嘅細路女？其實我都曾經有少少擔心，如果欣宜一直咁順利，會唔會唔知人生係咁困難嘅呢？會唔會驕傲呢？會唔會處事態度唔識得收斂呢？有得鍛煉對佢嚟講係好事，正如上次19宗投訴（欣宜拍攝的《靠自己》MV，廣管局接獲19宗投訴），比上次300幾宗（去年欣宜扮白雪公主曾收逾300宗投訴）進步咗，真係要多謝多謝，啲有心人都反省啦。」
採訪：戴彩煥
攝影：陳偉權
服裝：觀奇洋服、GianfrancoFerre
場地：珍寶海鮮舫