抵食日本料理$10有交易
今時今日$10都做到好多嘢，小至買吓周刊、家品，多至食日本料理都得，每日下午6時至晚上9時，將太日本料理店所有食品（除鰻魚拉麵外），全部一口價$10，所以只要幾十蚊，已經可以食得好豐富！
記者：黃婉冰
攝影：林栢鈞
鮑魚撈嘢
雖然係日本鮑魚，但口感同味道同貴價鮑魚差無幾，淋上少辣帶甜的日本醬汁，鮮甜味美，口感煙韌，必試之選。
蒲燒鰻魚飯
全店飯類同樣十蚊有得食（只限細碗），辣肉、雞扒、咖喱豬扒、冬菇雞粒、牛肉，連平時較貴的蒲燒鰻魚飯都有，鰻魚肉一樣咁大塊，抵食！
雜錦海鮮串（左）
東瀛雞肉串燒（右）
唔食飯，少少哋可以叫番幾款小食，雜錦海鮮串有炸帶子、墨魚丸、蟹柳、腸仔，雞肉串燒，淋上燒汁，同樣惹味，一碟有兩串。
日式辣肉拉麵
辣肉即辣豬頸肉，爽口豬頸肉加入日式香辣調味料，香而不太辣，可配湯麵或飯，豬頸肉切成條狀，既唔韌又有咬口，一舉兩得。
店名：將太日本料理
地址：北角英皇道165-175號福元街橋底（惠康對面）
電話：25034322
備註：星期日營業時間至下午2時半，惠顧滿$100可獲贈貴賓卡一張，憑卡可在推廣後繼續以$10優惠價享用各款食品，鰻魚拉麵除外。