黃伊汶早前去咗樟木頭幫無綫拍嘢，途經觀音山時，黃伊汶順道求番支事業籤，佢買咗三支叫做「金榜題名」嘅大香拜神，寺廟嘅香爐好大個，黃伊汶上香嗰陣兩隻手要伸好長至上到香，但因為佢着咗件tubetop，卒之搞到個身污糟邋遢。
黃伊汶話：「我裝完香之後見到兩邊『胳肋底』都黑晒，而且成身都係香爐灰，啲煙灰又吹上我個頭度，之後我重發覺頭頂有啲頭髮燒燶咗㖭呀。好彩我求到一支上上籤。」

臀部圓渾
黃伊汶喺廟裏面重遇上一個露械男嬰！佢笑住話：「我拜完神之後見到一個着住紅色肚兜嘅男嬰，當時佢露出重要部位同埋圓渾嘅臀部，個樣又好得意，所以我都忍唔住即刻抱住佢影相留念。」

陳豪捧蓋鳴暉勁瞓
陳豪噚日接受商台電話訪問時，提到噚晚《金牌冰人》播大結局，期望可以有三十五點收視。陳豪話都有同其他演員去睇蓋鳴暉嘅大戲，不過如果啲大戲太長就會悶到瞓着喎！問佢有冇約埋緋聞女友陳慧珊一齊去睇，佢話：「冇呀，啲鬼妹仔都唔會睇啦！」

馬仔否認唱帝女花侵權
馬浚偉同佘詩曼為無綫劇集《帝女花》唱嘅主題曲《帝女芳魂》，涉嫌侵犯唐滌生原著歌詞版權，馬仔嘅建星唱片公司總經理陳浩源噚日回應：「歌詞係岑偉宗重新填詞，公司亦就兩首歌詞嘅版權問題同律師徵詢過意見，兩首歌同唐滌生嘅《帝女花》校對過，並冇抄襲同侵犯版權成份。」