「最乞人憎佳麗」名銜非佢莫屬
馮仁昭四圍超:師奶港姐又姣又貪心

蘋果日報 2002/09/09 00:00


如果今年港姐競選有個「最乞人憎佳麗」名銜,相信一定非呢位「師奶」港姐莫屬,首先,因為佢嘅所作所為唔單止乞其他佳麗憎,而且重乞記者憎,甚至乎無綫班幕後都冇乜邊幾個鍾意佢。
「師奶」港姐本身成個師奶咁款,又成日喺人哋面前讚自己靚女,話喺街上面啲人點樣眼甘甘咁望住佢,搞到啲人聽完之後即刻想衝入廁所嘔。樣衰唔係罪過,但做人始終係謙虛啲好。

笑笑口電男人
最攞命嘅係「師奶」港姐自以為電力十足,每次同啲男人傾偈,總係笑口噬噬,扮到自己好有吸引力咁,但佢面對同性時,態度就完全唔同晒。重有就係「師奶」港姐成日向人展示佢啲名牌貨,但係好衰唔衰俾人發現佢原來好貪小便宜,係有乜着數都唔少得佢嗰份嘅人嚟嘅。

周杰倫嫌自己眼太細
周杰倫日前嚟咗香港參加商台嘅籃球賽,佢球技了得相信大家都知,原來佢咁「好波」係同性格有關。噚日周杰倫接受港台《舊日的足跡》節目錄音訪問時話:「我是獨子,性格孤僻,經常獨來獨往,朋友亦比較少,所以我喜歡打籃球,因為一個人都可以打,所以我經常打籃球。」周杰倫亦講到對自己樣貌嘅睇法,佢話自己個樣其實好普通,不過就嫌唔夠高同眼太細,而最滿意嘅就係個鼻,最有自信嘅就係音樂方面,唔知大家同唔同意呢?
混血靚女識朋友好開放
混血靚女早排同「細妹」個花心男友傳緋聞,事後混血靚女就梗係唔認啦,猛話同花心男友只係好朋友關係,不過有人就親眼見過佢兩個喺蘭桂坊一間酒吧攬頭攬頸,重一杯酒兩份飲,講嘢時又面貼面,混血靚女重旁若無人咁坐喺花心男友大髀度。如果咁都叫好朋友,睇怕一定有大把男人等住做混血靚女嘅好朋友。

郭可盈藏三百對鞋獲封「鞋后」
郭可盈日前幫一個內地時裝品牌拍咗輯新廣告,佢會做一年該品牌嘅代言人。郭可盈話:「我重得到四季時裝贊助,年中慳到唔少錢。我平時都唔係成日買名牌,有啲衫重只係可以着一次,所以姐姐都受惠㗎。」郭可盈又自爆屋企收藏咗三百幾對皮鞋,新屋重特別訂做咗個新鞋櫃,朋友見佢有咁多靚鞋,重封可盈做「鞋后」㖭。

方力申真金不怕洪爐火
方力申(Alex)噚日去九龍城喇沙書院為「小飛魚游泳賽」任頒獎嘉賓,入選香港亞運游泳代表隊嘅飛魚Alex日前參加2002香港游泳錦標賽,重攞咗一百米背泳金牌,雖然外界曾經質疑過Alex入選亞運泳隊嘅資格,不過Alex話人哋咁諗都好正常,因為自己確實係好耐冇練水。