大胃王:$178任食矜貴澳洲龍蝦仔

蘋果日報 2002/03/25 00:00


女士們面對Buffet枱上各款美食時,心情既興奮又緊張,要食定要靚,係時候作出抉擇,海鮮和少脂肪的扒類就成了她們的頭號目標。即叫即煮澳洲貴價龍蝦仔、海鮮、羊仔扒全部任你食,食幾多都唔肥,絕對可以畀你食番夠本!

記者:黃婉冰 攝影:陳穎 ImageGirl:Natalie
醉翁龍蝦仔
淡水龍蝦仔,身形嬌小玲瓏但肉地爽口,帶有微微淡水的鮮味,只得澳洲及新西蘭,才有這種有拑龍蝦仔,所以身價較高。大廚會用烹調醉翁蝦的方法,即場用滾熱的花雕酒將生猛龍蝦仔灼熟,人客叫幾多灼幾多,絕對唔係限量配給。

試味報告:
龍蝦仔肉質清甜爽滑,新鮮蝦肉唔會黐殼,蝦肉透着淡淡花雕酒香,酒味不太濃,安分守己做陪襯角色。
野菌煙肉牛仔扒
荷蘭牛仔肉憑着一身鮮嫩,無多餘肥膏的條件下,突圍而出。切片加少許調味料香煎,原汁又原味,再惹味些,配以用煙肉、各款雜菌如Cepe,Morel、鮮冬菇做的雜菌汁,來個鮮味、惹味大夾攻。

試味報告:
牛仔扒肉味沒有牛扒般濃,以鮮嫩為主,煎過後有帶燒烤香味,雜菌汁吊出肉味。


香草燒羊鞍
在意大利餐廳叫一客同樣質素的羊鞍,起碼要過百元才有交易,這裏就任你品嘗。選用6至9個月大的新西蘭羊仔鞍,去脂後的羊鞍頓時變得窈窕,撒上香草、蒜茸、橄欖油,燒香外層鎖住肉汁,再淋蒜茸香草汁,令羊肉多添一分惹味。

試味報告:
羊鞍肉質嫩滑不膩,有羊肉鮮味但無羶味,細細件分量剛剛好。
各款即炒海鮮
中式小炒永遠都受歡迎,更何況是海鮮?新鮮游水海蝦、墨魚仔、青口,猶如海鮮市場般鋪滿成張枱任你揀,用XO醬定豉汁炒全由你話事,是凍冰冰的魚生、生蠔外的另一個選擇。

試味報告:
有濃汁掩護,食得出海鮮夠新鮮,XO醬惹味,豉汁有大牌檔風味,各有各精采,最好兩款都試勻。
各款飲品及甜品
除任食各款中、西菜式外,還可任飲紅酒、橙汁、汽水,每人更奉送燕窩布甸一客,記住讓個肚預留位置,食埋免費甜品先好走。
淮山杞子燉竹絲雞
燉湯材料簡單,但每盅都燉足三個鐘頭,夠晒火候。淮山、杞子、竹絲雞、紅棗,四種湯料經過長時間火力逼攻下,鮮味、肉味融為一湯,竹絲雞不肥不膩,杞子有明目作用,唔止燉湯咁簡單。

試味報告:
湯水清香甜潤,火候夠之餘湯料亦足,一盅盅獨立包裝,與酒樓供應的毫無分別。
記者的話
澳洲龍蝦仔晚晚供應,要確保新鮮,所以每次供應始終有限,如果當晚反應好,兩百多隻都可以一一掃光,想確保有得食?早去為妙。
店名:世紀咖啡閣
電話:25988888內線6350
地址:灣仔謝斐道238號1樓
座位:170個
營業時間:星期一至五上午6時半至下午3時,晚上6時至凌晨1時;星期六、日及公眾假期全日營業。
付款方法:現金及信用卡(Visa,Master,AE,Diners)
收費:星期日至四成人每位$178,小童每位$108,星期五、六及公眾假期成人每位$198,小童每位$108。
自助餐日期及時間:由即日起至4月13日,每晚6時半至9時半。