英皇證券噚日掛牌，楊家舉家上下都好重視呢一日，全家總動員出席喺港交所舉行嘅掛牌儀式盛事，惟獨唔見咗大女婿張堅庭。
噚日出席嘅家族成員，包括英皇集團主席楊受成，佢太太陸小曼，大女楊諾思，二女（英皇證券董事總經理）楊玳詩，細女楊思思，同埋大仔楊其龍；唔單止咁，甚少露面嘅楊老太都盛裝出席，為孫女打氣；楊受成大家姐丘楊寶春，兩個細佬楊超成同楊力成都嚟捧場。只係細仔身處美國讀書，未能抽空出席；而大女婿張堅庭亦失蹤影。
張堅庭近排忙住拍一齣大陸中產階級嘅電影，已經離棄香港電影市場；最近又同無綫主持一個有獎遊戲節目《一擲千金》，唔知係咪因為咁，唔得閒理外家啲事；不過如果佢將外父家族嘅英皇證券股份，當係電視遊戲節目嘅獎品送出去，以噚日股價高出招股價79%嘅表現，相信會好受觀眾歡迎。而噚日英皇證券強勁嘅股價表現，唔知係咪都得力於楊氏家族嘅強力支持呢？

作為英皇證券董事總經理嘅楊玳詩同記者話，好滿意噚日嘅股價表現，感到好興奮；被問及點樣同啲銀行搶生意，佢話只要個餅越做越大，證券行仍有生存空間，各有各做。
喺上市儀式上，港交所行政總裁周文耀都畀面出席；而英皇證券亦捐咗100萬畀公益金，以取得717靚NO.編號；仲送咗隻金牛畀港交所做禮物，寓意牛市衝天，公關小姐話係向同系公司英皇珠寶買入，所以只係成本價，價值5位數字啫。
[email protected]